Ўтган мавсум якунида «Реал» билан Европа Чемпионлар Лигасида ғолиб чиққан, Евро-2016да Португалия термаси сардори сифатида чемпионликни қўлга киритган Криштиану Роналду мухлису мутахассислар тахминларини оқлаб, «Олтин тўп» совринига эга бўлди. Шу тариқа 31 ёшли юлдуз тўртинчи марта ушбу мукофотни ўзиники қилди. Хабарингиз бор, эндиликда Ballon d`Or ғолибларини аниқлаш жараёни ФИФА иштирокисиз ўтяпти.

2009 йилга қадар France Football нашри журналистлар ўртасида сўров ўтказиш орқали энг яхшиларни аниқлаб келаётганди. Шу вақтга қадар турли юлдузлар ушбу совринга эга бўлишган. Криштиану Роналду эса фаолиятидаги илк «Олтин тўп»ни 2008 йили «Манчестер Юнайтед»да ўйнаб юрган кезлари қўлга киритганди. Орадан 12 ой ўтгач, нуфузли мукофотни олиш ҳуқуқини азалий рақобатчиси Лионель Мессига бой берган.

2010 йили Халқаро футбол федерацияси ва France Football ўзаро келишувга кўра, «Олтин тўп» ва «ФИФАнинг йил ўйинчиси» совринларини бирлаштиришди. Шу тариқа юқори даражадаги мукофот таъсис этилди. Эндиликда йил қаҳрамонларини аниқлаш жараёнида нафақат журналистлар, балки футболдаги профессионаллар - миллий термалар бош мураббийлари ва сардорлари ҳам қатнаша бошлашди. Роналду-Месси «дуэл»ининг 2013 ва 2014 йиллардаги қарама-қаршилиги португалиялик юлдуз фойдасига ҳал бўлган. Аммо жорий мавсумдан эътиборан Франциянинг обрўли нашри ФИФА билан ҳамкорликни тўхтатди. Натижада томонлар аввалги форматга қайтишди: France Football журналистлар ўртасида сўров ўтказишда давом этади. Роналду ЕЧЛ ва Евро-2016да ғолиб чиққач, тенгсиз фаворит сифатида кўрилаётганди.

«Олтин тўп-2016»га даъвогар 30 футболчидан иборат рўйхат октябрь ойи охирларида эълон қилинганди. Унда Роналду ва албатта, Мессидан ташқари, дарвозабонлар Мануэль Нойер, Жанлуижи Буффон, Уго Льорис, Руй Патрисиу, ҳимоячилар Серхио Рамос, Пепе, Диего Годин, ярим ҳимоячилар Поль Погба, Андрес Иньеста, Лука Модрич, Тони Кросс, Кевин Де Брюйне, Коке, Артуро Видаль, Риёд Маҳрез, Димитри Пайе, ҳужумчилар Антуан Гризманн, Неймар, Луис Суарес, Гарет Бэйл, Златан Ибрагимович, Роберт Левандовс­ки, Томас Мюллер, Гонсало Игуаин, Пауло Дибала, Серхио Агуэро, Пьер-Эмерик Обамеянг ҳамда Жейми Вардининг номлари қайд этилганди.

Дарҳақиқат, ушбу пойга ғолибига айланиш борасида Португалия термаси сардорининг имкониятлари жуда юқори баҳоланаётганди. Ҳаттоки, Месси ва Гризманн ҳам ўз ғалабаларига ишонишмаган бўлса керак. Дарвоқе, айнан португалиялик, аргентиналик ва франциялик футболчилар 2016 йили «ФИФАнинг йил ўйинчиси» номига даъвогарлар учлигидан жой олишди. Бу мукофот ғолиби 2017 йилнинг 9 январь куни Цюрихда ўтказиладиган тақдирлаш маросимида аниқланади.

Роналду ва Гризманн ОАВга интервью беришаркан, «Олтин тўп» йўлидаги ўз имкониятларини баҳолаб, сов­рин борасида турлича қарашга эга эканликларини намоён этишди.

- Мақсадим - ҳар йили «Олтин тўп»га эга чиқиш. 2015 йили совринни қўлга киритолмадим. 2016 йилда бунга эришмоқчиман. Чунки жорий йил мен учун муваффақиятли кечди. Шубҳасиз, бу фаолиятимдаги энг яхши мавсум, - деди Роналду.

- Ҳар доим «Олтин тўп» ҳақида ўйлайман, деёлмайман. Шунчаки, ўз ишимни бажариб, кўпроқ голлар уришга интиламан. Фаолиятимда етишмаётган нарсаларга эришиш учун совринлар ютишим зарур. Ҳозирча тўғри йўлдан кетяпман, - деганди France Football мукофотига даъвогар Гризманн.

Жаҳон футболи «Олтин тўп» кимга насиб этиши хусусида тахминларни ўртага ташлаётган паллада Роналду ўғли ва онаси билан 12 декабрь куни ўтказилиши лозим бўлган тақдир маросими саҳналарини съёмка қилиш жараёнида қатнашаётганди. Чунки муҳим тадбирда иштирок этолмаслиги аниқ эди. Гап шундаки, Криштиану «Реал» билан Японияга йўл олиб, клублар ўртасидаги жаҳон чемпионати ярим финалига тайёргарлик кўриши кўзда тутилганди. Европалик «қироллар»ни Мексиканинг «Америка» клубига қарши учрашув кутиб турибди. Гарчи Зайниддин Зидан оммавий тарзда Роналдуни қўллашини айтган бўлсада, тўпурар ҳужумчини қўйиб юборишни хоҳламаслиги тайин эди.

Энди «Олтин тўп»ни қўлга киритиш борасидаги кўрсаткичларга назар ташласак. Криштиану бу совринга тўртинчи марта эга чиқди, Мессида эса ҳозирча биттага кўпроқ. Илк бор мазкур мукофотни 60 йил аввал англиялик Стэнли Мэтьюз қўлга киритганди. Кейинги уч йил мобайнида «Реал» вакиллари илғорлик қилишган: икки марта Альфредо Ди Стефано, бир марта Раймон Копа. Мана, яна муваффақият чўққисини мадридликлар вакили забт этмоқда. Роналду бу гал совринни қўлга киритиш чоғида йиғламади, аксинча, жилмайди.

- «Олтин тўп»ни тўртинчи марта қўлга киритаётганимдан фахрланаман, - деди Криштиану ўз интервьюсида. - Ушбу совринга илк бор эга чиққанимда қандай ҳаяжонланган бўлсам, ҳозир худди шундай ҳолатдаман. Орзум яна рўёбга чиқди. Тўрт карра «Олтин тўп» соҳибига айланишим мумкинлигини тасаввур ҳам қилолмасдим. Жуда хурсандман, бахт­лиман. Фурсатдан фойдаланиб, клуб ва терма жамоадаги шерикларимга миннатдорчилик билдирмоқчиман. Атрофимдагилар, барча футболчиларга раҳмат. Улар ушбу индивидуал совринни қўлга киритишимда ёрдам беришди. Бу ажойиб тўпни ушлаб турганимдан ғурур туймоқдаман.

«Олтин тўп»нинг барча соҳиблари

Изоҳ: 2010-2015 йиллар мобайнида «Олтин тўп» ФИФА билан ҳамкорликда топширилган.