Бундан бир неча кун олдин Эрон миллий терма жамоаси бош мураббийи Карлос Кейруш ўз лавозимидан истеъфога чиқишни сўраб, ариза ёзганди. Аммо Эрон футбол федерацияси унинг истеъфосини қабул қилмади ва португалиялик мутахассис ўз лавозимида ишлашда давом этади.
Аввалроқ ҳам бир неча марта Кейруш Эрон терма жамоасидан кетиши ҳақида маълумотлар пайдо бўлганди, аммо ҳар сафар мутахассиснинг истеъфоси юз бермади.
Бундай гап-сўзлар бежизга пайдо бўлмайди. Боиси, Эрон термаси мураббийи бирорта муаммога дуч келса, ўша заҳоти "кетаман" деб оламга жар солади. Федерация мутасаддилари муаммони ҳал қилиб, мураббийнинг кетишга йўл қўймайдилар. Кейруш шу йўл билан анча-мунча масалаларни ҳал қилиб олади. У "пихи" қайрилиб кетган қари "туллак".
Терма жамоа манфаати йўлида Самвел Бабаян португалиялик ҳамкасбидан баъзи нарсаларни ўрганса арзийди. Нима дедингиз?
