Учрашувнинг дебюти каталонияликлар учун жуда ёмон бўлиши мумкин эди. Учинчи дақиқадаёқ Рауль Гарсия мезбонлар жарима майдончаси ичида тўпни қабул қилди ва 7-8 метрлардан яқин бурчакка зарба берди. Тўп Тер Штегеннинг қўли орқали устунга тегиб қайтди.
Орадан кўп ўтмасдан бильбаоликлар ҳужумчиси Уильямс чап қанотдан Лапорт етказган аниқ узатмани бош билан дарвозага жойлай олмади.
Энрике шогирдлари бу сафар вазиятлардан фойдаланишда нисбатан самарали ҳаракат қилишди. Баҳснинг 18-дақиқасида Неймар чап қанотда бир ҳимоячини алдаб жарима майдончасига кирди ва тўпни орқароққа узатди. Алькасер 6-7 метрлардан зарба билан дарвозани ишғол қилди. Бу Пако "Барса" сафида Ла лигадаги дастлабки голи бўлди.
Биринчи бўлимга тугашига 5 дақиқа қолганида Лионель Месси жарима зарбасини голга айлантирди. Аргентиналик футболчи чап қанотда белгиланган жарима тўпи ўткир бурчак остида бўлишига қарамай тўғридан-тўғри зарба берди. Дарвозабон Ираисос ҳимоячининг ҳаракатидан чалғиб қолди ва тўпни ўтказиб юборди.
Иккинчи бўлимда Месси захира олинганидан кейин унинг позициясида ҳаракат қила бошлаган Алеиш Видаль ҳужумчиларга хос ҳаракат билан учинчи гол муаллифига айланди.
Ушбу ғалабадан кейин "Барселона" ўз очколарини 45тага етказди. "Кўк-анорранглилар" 2та захира ўйинига эга бўлган "Реал"дан 1 очко ортда қолишмоқда.
Испания Ла лигаси, 21-тур
"БАРСЕЛОНА" - "АТЛЕТИК БИЛЬБАО" 3:0 (2:0, 1:0)
Голлар: 1:0 – 18 Пако Алькасер, 2:0 – 40 Месси, 3:0 – 67 Алеиш Видаль.
Барселона – тер Стеген, Пике (Маскерано, 46), Матье, Умтити, Алеиш Видаль, Рафинья (Ракитич, 54), Туран, Андре Гомеш, Месси (Сержи Роберто, 64), Пако Алькасер, Неймар.
Атлетик – Ирайсос, Иньиго Лекуэ (Адурис, 52), Баленсиага, Йерай Альварес, Де Маркос, Итурраспе, Сан Хосе (Беньят, 59), Муниаин, Рауль Гарсия (Эрасо, 74), Иньяки Уильямс, Лапорт.
Огоҳлантиришлар: Пике (22), Итурраспе (27), Де Маркос (34), Лапорт (70).
