OptaJose’нинг X ижтимоий тармоғида хабар беришича, «Барселона» Европа чемпионлар кубоги / УЕФА Чемпионлар лигаси тарихида илк бор кетма-кет 10 та ўйинда дарвозасидан гол ўтказиб юборди.
Чемпионлар лигасининг умумий босқичи 7-тури доирасида «Барселона» Праганинг «Славия» жамоасини 4:2 ҳисобида мағлуб этди.
13 очко тўплаган «Барселона» Чемпионлар лигаси турнир жадвалида тўққизинчи ўринни эгаллаб турибди. Праганинг «Славия» жамоаси эса 3 очко билан 34-ўринда жойлашган. Каталонияликлар навбатдаги учрашувини умумий босқич доирасида 28 январь куни «Копенгаген»га қарши ўтказади. Чехия клуби эса шу куни «Пафос» билан баҳс олиб боради.
Жорий мавсумдаги Чемпионлар лигаси финали Будапештдаги «Пушкаш Арена» стадионида бўлиб ўтади. Мусобақанинг ҳал қилувчи ўйини 2026 йил 30 май куни ўтказилади.













