Ўтаётган ҳафта қизиқарли ўйинларни тақдим этишдан тўхтамаяпти. Чемпионлар лигаси нимчорак финали дастлабки ўйинларининг илк ҳафтасида «Барселона» ва «Арсенал»нинг қақшатқич мағлубиятини, «Реал»нинг иродали ғалабасини ва «Бенфика»нинг самарали ўйинини кўрган мухлисларни энди Европа Лигаси 1/16 финали баҳслари кутиб турибди.
Нуфузи жиҳатидан Европада иккинчи ўринда турувчи ушбу мусобақа ғолиблигига асосий даъвогарлардан бири шубҳасиз «Манчестер Юнайтед»дир. Европа Лигасидаги чемпионлик Чемпионлар Лигасига тўғри йўлланма бериши бошқа жамоалар сингари Премьер Лигада 6-ўринда бораётган «Манчестер Юнайтед»да ҳам иштиёқ уйғотгани табиий.
Бироқ бу йўлда «манкунианлар» 1/16 финалдаёқ осон бўлмаган рақиб – Франциянинг «Сент-Этьен» жамоасига қарши баҳс олиб боради. Бу 1 Лиганинг энг ҳимоявий ўйин кўрсатувчи жамоаларидан бўлиб, уларга 1 тадан ортиқ гол уриш камдан-кам жамоага насиб қилади. Бу мавсумда «ПСЖ»дан ҳам, «Монако»дан енгилмаган «яшиллар» сўнгги мавсумларда фақат кучли бешликдан жой олиб келмоқда.
Бундан ташқари, «Сент-Этьен» Франция чемпионлигини энг кўп қўлга киритган жамоадир (10 марта). Бу кўрсаткични ҳали на 2000-йилларнинг «Лион»и, на 2010-йилларниг «ПСЖ»си янгилай олгани йўқ. Ўзининг «олтин даври»ни 1970-йилларда ўтказган жамоа учун «Манчестер Юнайтед» билан тўқнашув жуда муҳим, зеро бу «Сент-Этьен»нинг ўша даврдан буён Европа мусобақаларида дуч келаётган энг кучли рақибидир.
Тўғри, ўтган йилларда «Интер», «Лацио», «Вердер» каби жамоалар «Сент-Этьен»га рақиблик қилган, бироқ уларнинг бирортаси, ҳатто «Интер» ҳам (2014-йилда) бу даражадаги нуфузга эга эмас эди. «Манчестер Юнайтед» эса ҳақиқий юлдузлар тўпланган ва кучга тўлган жамоа. Бу сўнгги йилларда ўзини ўнглаб олишга эришган ва Европа майдонларига қайта олган жамоа учун мукофотдир.
«Жоффруа Гишар» стадиони Бажжо ва Веанинг «Милан»и, Вера ва Канунинг «Арсенал»и ёки Ронладинёнинг «Барселона»сини кўрган бўлса ҳам, булар асосан ўртоқлик учрашувлари эди ва ҳозиргидек спортча беллашув иштиёқидан мосуво эди. Шундай экан, жавоб ўйини янада қизиқарли кечиши шубҳасиз.
Бу баҳсга қизиқишни оширадиган яна бир жиҳат – ака-ука Погбалар тўқнашувидир. Жаҳон футболининг энг кўзга кўринган юлдузларидан бири бўлган Пол Погбанинг акаси Флорентин Погба айнан «Сент-Этьен» шарафини ҳимоя қилади. Шунингдек, Пол Франция терма жамоасида ҳаракат қилса, Флорентин оиласининг тарихий ватани – Гвинея терма жамоасини танлаган. Бу тўқнашувда Погбалар оиласига қийин бўлиши турган гап.
