Келаётган ҳафта Осиё Чемпионлар лигасида иштирок этаётган Тошкент клублари 2-тур ўйинларида майдонга тушади.
27 февраль куни «Локомотив» ўз уйида Амирликларнинг «Ал-Аҳли» клубини қабул қилса, 28 февраль куни «Ал-Айн» «Бунёдкор» стадионида меҳмон бўлади.
Беллашувлар учун чипталар сотувга чиқиб улгурмади. «Локомотив» вакилининг «Дарё»га маълум қилишича, чипталар уч хил тоифада бўлади ва секторига қараб 10, 15 ҳамда 35 минг сўмдан сотилади. Аввал хабар қилинганидек, 55 ёшдан катта мухлислар ўз паспортларини кўрсатганлари ҳолда «Локомотив» стадионидан бепул чипта олиш имкониятига эга.
Маълумотга кўра, яқин орада «Локомотив» стадиони кассаси терминал билан таъминлади ва чипталарни пластик карточкага сотиб олиш имконияти пайдо бўлади.
«Ал-Аҳли» клубига қарши беллашув душанба куни 16:00 да старт олади. 1-турни Саудияда ўтказган «темирйўлчилар» Чемпионлар лигасида илк бор иштирок этаётган ва «Ал-Иттиҳод» турнирдан четлаштирилгани учунгина мусобақага қўшилган «Ат-Таавун»га 0:1 ҳисобида имкониятини бой берганди.
Осиё Чемпионлар лигаси
«А» гуруҳи. 2-тур
27 февраль, душанба
«Локомотив» — «Ал-Аҳли» (БАА) — 16:00
«Бунёдкор»нинг сешанба куни бўлиб ўтадиган ўйини чипталари сотувга чиқиб улгурмади. Клуб вакилининг маълум қилишича, чипталар кассада кўриниш берганида 15 ва 30 мингдан сотилади. Уларни пластик карточкаларга харид қилиш имконияти мавжуд.
«Бунёдкор» ўз учрашувини 18:00 га тайин қилган. Клуб гуруҳ босқичини Саудияда «Ал-Аҳли»дан 2 та жавобсиз гол ўтказиш билан бошлаганди.
Осиё Чемпионлар лигаси
«C» гуруҳи. 2-тур
28 февраль, сешанба
«Бунёдкор» — «Ал-Айн» (БАА) — 18:00
