Ўтган йили “Лестер” чемпионатда пешқадамлик қилаётган пайтларда, то сўнгги ойларгача, мақолаларда ҳам, таҳлилий кўрсатувлардаям, баҳс мунозараларда ҳам деярли бир хил фикрлар янграганди: Жамоа яхши ўйнаяпти, қойил, лекин чемпион бўла олмайди. “Лестер” деярли барча ўйинларда бир хил таркибда ҳаракат қилмоқда, бирортаси жароҳат олса қийналиб қолади. Варди гол уришни тўхтатса муаммолар бошланади. Кантенинг спорт формаси тушиб кетса ўринбосар йўқ. Умуман, жамоа савияси Англия чемпионати ғолиблигига тортмайди, барибир, жамоа пасайиб кетади. У билан курашаётган “Манчестер Сити” ёки “Арсенал” каби жамоаларнинг савияси бир калла баланд.
Бундай фикрлар деярли ҳамма томонидан айтилган, анча салмоқли, анча мантиқли туюлган бўлса-да, якунда нотўғри бўлиб чиқди. “Лестер” чемпион бўлди.
Энг қизиғи, яқинда АПЛ нинг ушбу мавсумига бағишланган таҳлилий кўрсатувни кўриб қолдим. Студияда ўтирган бир гуруҳ футбол журналистлари “Лестер”нинг бугунги ҳолати ҳақида мунозара қилдилар. Жамоанинг янги йилда умуман гол ура олмаётгани айтилди. “Лестер” хавфли зонага яқинлашиб қолгани ҳақида гаплашилди.
