O‘tgan yili “Lester” chempionatda peshqadamlik qilayotgan paytlarda, to so‘nggi oylargacha, maqolalarda ham, tahliliy ko‘rsatuvlardayam, bahs munozaralarda ham deyarli bir xil fikrlar yangragandi: Jamoa yaxshi o‘ynayapti, qoyil, lekin chempion bo‘la olmaydi. “Lester” deyarli barcha o‘yinlarda bir xil tarkibda harakat qilmoqda, birortasi jarohat olsa qiynalib qoladi. Vardi gol urishni to‘xtatsa muammolar boshlanadi. Kantening sport formasi tushib ketsa o‘rinbosar yo‘q. Umuman, jamoa saviyasi Angliya chempionati g‘olibligiga tortmaydi, baribir, jamoa pasayib ketadi. U bilan kurashayotgan “Manchester Siti” yoki “Arsenal” kabi jamoalarning saviyasi bir kalla baland.
Bunday fikrlar deyarli hamma tomonidan aytilgan, ancha salmoqli, ancha mantiqli tuyulgan bo‘lsa-da, yakunda noto‘g‘ri bo‘lib chiqdi. “Lester” chempion bo‘ldi.
Eng qizig‘i, yaqinda APL ning ushbu mavsumiga bag‘ishlangan tahliliy ko‘rsatuvni ko‘rib qoldim. Studiyada o‘tirgan bir guruh futbol jurnalistlari “Lester”ning bugungi holati haqida munozara qildilar. Jamoaning yangi yilda umuman gol ura olmayotgani aytildi. “Lester” xavfli zonaga yaqinlashib qolgani haqida gaplashildi.
