Уругвай терма жамоасининг собиқ ҳужумчиси Себастьян Абреу турли клубларга ўтиш бўйича ўз рекордини янгилади.
40 ёшли футболчи бугун фаолиятидаги 29-жамоа билан шартнома имзолади ва Уругвай чемпионатининг қуйи лигаси вакили «Сентраль Эспаньол» клубига ўтди.
Абреу фаолиятини 1995 йилда, Уругвайнинг «Дефенсор Спортинг» клубида бошлаган эди. Кейинчалик у 10та мамлакат - Уругвай, Мексика, Сальвадор, Испания, Бразилия, Эквадор, Греция, Исроил, Парагвай ва Аргентина чемпионатида иштирок этишга муваффақ бўлди. Уругвай терма жамоаси сафида 70 ўйин ўтказиб, 26 гол урди.
