Аргентина терма жамоаси футболчиси Лионель Мессининг адвокати адвокат Хуан де Диос Креспо ФИФА футболчининг дисквалификация муддатини қисқартиришига умид қилишини айтиб ўтди. Испаниялик мазкур адвокатни Аргентина футбол ассоциацияси ёллади.

«Биз AFAга хат билан мурожаат қилдик. Ассоциация эса, ўз навбатида, ФИФАга мурожаат қилди. Адвокатларнинг ўзи тўғридан-тўғри апелляция бера олишмайди, бу ишни ассоциация қилади. ФИФА мурожаатга жавоб бермагунча, бу ҳақда бирор нарса гапириб бўлмайди. Шу боис, сукут сақлашни афзал биламан. Бу борада биз ҳақмиз ва ФИФА Мессининг дисквалификация муддатини қисқартиришига ишонамиз», — деди Креспо.

ФИФА «Барселона» ҳужумчисини терма жамоанинг 4та ўйинига дисквалификация қилди. Аргентина ва Чили терма жамоалари ўртасидаги ўйинда (1:0) Месси лайнсменни ҳақорат қилгани боис ФИФА унга нисбатан шундай жазо чорасини қўллади. Шунингдек, футболчи 10 минг швейцария франки миқдорида жаримага тортилди. Лионелнинг таъкидлашича, у ҳакамни ҳақорат қилмаган, ҳақоратли сўзлар шунчаки ҳавога айтилган.