"Реал" ҳужумчиси Криштиану Роналду фаолиятини "ПСЖ"да давом эттириш борасида бош қотирмоқда. Бу ҳақда Marca нашри хабар тарқатди.

Португалиялик футболчи "Манчестер Юнайтед"га ўтишни истаганди, аммо "қизил иблислар" бош мураббийи Жозе Моуриньо ушбу трансферга қаршилик қилди. Шу боис, Роналду бор эътиборини "ПСЖ" билан музокараларга қаратди.

"ПСЖ" президенти Носсир ал-Хелайфий "Реал" раҳбари Флорентино Перес ва Криштиану билан яхши муносабатга эга. У 2012 йилдаёқ Роналдуни сотиб олишни истаганди. Ўшанда португалиялик ҳужумчи "Реал"дан кетиши мумкинлиги ҳақида гапирган бўлса, "ПСЖ" унинг трансфери учун 120 млн евро тўлашга тайёр бўлганди. Ҳозирги кунга келиб 32 ёшли футболчининг трансфер нархи 200 млн еврога етиши ва бу футбол тарихидаги рекорд трансферга айланиши мумкин.

Эслатиб ўтамиз, 31 июль куни Роналду Испания прокуратурасида солиқ тўламаганлик айблови юзасидан кўрсатма беради.