Колумбия терма жамоаси ҳужумчиси Радамель Фалькао ва Перу терма жамоаси ярим ҳимоячиси Ренато Тапия ЖЧ-2018 саралаш босқичининг сўнгги тури доирасида бўлиб ўтган ўйин пайтида музокара ўтказишди.

Фалькаонинг тан олиб айтишича, у перуликларга ҳар иккала жамоани дуранг натижа қаноатлантиришини таъкидлаган. Натижада Колумбия ЖЧга тўғридан-тўғри йўлланмани қўлга киритган бўлса, Перу қитъалараро плей-офф босқичига йўл олди.

«Бошқа ўйинларда қандай натижалар қайд этилаётганини билардик. Буни билган ҳолда ўйнадик. Маълум вақтда мен буни Перу терма жамоаси футболчиларга етказдим», – деди Фалькао.

«Ўйин тугашига 5 дақиқа қолганида колумбиялилкар бизга келишди ва бошқа ўйинларда вазият қандай эканини айтишди. Шу тариқа, ўйинни шундай ҳолда якунладик, боиси, бизга дуранг керак эди... Мен Радамел билан гаплашдим. У менга дуранг ҳар иккала терма жамоани қаноатлантиришини айтди. Лекин бу футбол. Биз ғалаба учун ўйнаймиз», – деди Тапия.

Перу терма жамоаси бош мураббийи Рикардо Гарека ўйин келишилган руҳда ўтганини инкор қилди: «Бизга ғалаба керак эди, уларга ҳам. Қандай қилиб келишув бўлиши мумкин? Бу шунчаки миш-миш. Табиийки, баҳс сўнгида биз бошқа ўйинлар натижаларини билардик ва ўзимизга: "Озгина хотиржам бўлинг, биз таваккал қилишимиз керак эмас", - дедик».