Kolumbiya terma jamoasi hujumchisi Radamel Falkao va Peru terma jamoasi yarim himoyachisi Renato Tapiya JCH-2018 saralash bosqichining so‘nggi turi doirasida bo‘lib o‘tgan o‘yin paytida muzokara o‘tkazishdi.

Falkaoning tan olib aytishicha, u peruliklarga har ikkala jamoani durang natija qanoatlantirishini ta’kidlagan. Natijada Kolumbiya JCHga to‘g‘ridan-to‘g‘ri yo‘llanmani qo‘lga kiritgan bo‘lsa, Peru qit’alararo pley-off bosqichiga yo‘l oldi.

«Boshqa o‘yinlarda qanday natijalar qayd etilayotganini bilardik. Buni bilgan holda o‘ynadik. Ma’lum vaqtda men buni Peru terma jamoasi futbolchilarga yetkazdim», – dedi Falkao.

«O‘yin tugashiga 5 daqiqa qolganida kolumbiyalilkar bizga kelishdi va boshqa o‘yinlarda vaziyat qanday ekanini aytishdi. Shu tariqa, o‘yinni shunday holda yakunladik, boisi, bizga durang kerak edi... Men Radamel bilan gaplashdim. U menga durang har ikkala terma jamoani qanoatlantirishini aytdi. Lekin bu futbol. Biz g‘alaba uchun o‘ynaymiz», – dedi Tapiya.

Peru terma jamoasi bosh murabbiyi Rikardo Gareka o‘yin kelishilgan ruhda o‘tganini inkor qildi: «Bizga g‘alaba kerak edi, ularga ham. Qanday qilib kelishuv bo‘lishi mumkin? Bu shunchaki mish-mish. Tabiiyki, bahs so‘ngida biz boshqa o‘yinlar natijalarini bilardik va o‘zimizga: "Ozgina xotirjam bo‘ling, biz tavakkal qilishimiz kerak emas", - dedik».