Испания чемпионатининг дастлабки 14та тури ортда қолди. Бу ўйинларда "Реал" 8та ғалабага эришди, 4та дуранг ўйнаб, 2 марта ютқазди. Натижада Зидан шогирдлари 28 очко билан жадвалда 4-ўринни эгаллаб туришибди. Шунча очко жамғарган «Севилья» 5-ўринни эгаллаб турибди ва кейинги турда "Мадрид"га рақиблик қилади.

«Қаймоқранглилар» ушбу мавсумда сўнгги 9 мавсум ичида энг ёмон натижани қайд этишмоқда. "Қироллик клуби" сўнгги марта 2008/09 йилги мавсумда Бернд Шустер қўлостида бундан ҳам ёмонроқ натижа намойиш қилганди: 14-турдан кейин 8 ғалаба, 2 дуранг ва 4 мағлубият — 26 очко.

"Реал" кейинги мавсумларда дастлабки 14та ўйиндан кейин ушбу мавсумдагидан кам очко тўпламаган. «Реал Мадрид»нинг сўнгги 10 мавсумда 14-турдан кейин натижалари қуйидагича бўлган:

Ла Лига 2008/09: 26 очко, мураббий - Бренд Шустер (5-ўрин — 14-турдан кейин). Мавсум якунида: 2-ўрин (78 очко).
Ла Лига 2009/10: 34 очко, мураббий - Мануэль Пеллегрини (2-ўрин). Мавсум якунида: 2-ўрин (96 очко).
Ла Лига 2010/11: 35 очко, мураббий - Жозе Моуриньо (2-ўрин). Мавсум якунида: 2-ўрин (92 очко).
Ла Лига2011/12: 37 очко, мураббий - Жозе Моуриньо (1-ўрин). Мавсум якунида: 1-ўрин (100 очко).
Ла Лига 2012/13: 29 очко, мураббий - Жозе Моуриньо (3-ўрин). Мавсум якунида: 2-ўрин (85 очко).
Ла Лига 2013/14: 34 очко, мураббий - Карло Анчелотти (3-ўрин). Мавсум якунида: 3-ўрин (87 очко).
Ла Лига 2014/15: 36 очко, мураббий - Карло Анчелотти (1-ўрин). Мавсум якунида: 2-ўрин (92 очко).
Ла Лига 2015/16: 30 очко, мураббий - Рафа Бенитес (3-ўрин) Мавсум якунида: 2-ўрин (90 очко).
Ла Лига 2016/17: 34 очко, мураббий - Зайниддин Зидан (1-ўрин). Мавсум якунида: 1-ўрин (93 очко).
Ла Лига 2017/18: 28 очко, мураббий - Зайниддин Зидан (4-ўрин).

«Мадрид» Ла Лиганинг ўтган мавсумида ҳар бир ўйинда ўртача 2,8та гол урганди. Ушбу мавсумда эса жамоа битта ўйинда киритаётган тўплар сони 1,7тани ташкил қилмоқда. Жамоа ҳужумчилари Роналду ва Бензема мазкур мавсумда бор-йўғи 2 мартадан рақиб дарвозасини ишғол қилишди. Криштиану «Мадрид»га келган 2009/10 мавсумдан буён тўпурарлик кўрсаткичи бўйича энг ёмон натижа намойиш қилмоқда. Аввалги мавсумларда португалиялик ҳужумчи кўпроқ гол урганди: 6, 16, 6, 13, 17, 7, 10, 10 ва… 2та гол.

Криштиану ушбу мавсумда рақиблар дарвозасига 68 марта зарба бериб, уларнинг 2тасини голга айлантирди (самарадорлик – 3,8 %). Ла лигада энг кўп гол урган футболчи Лионель Месси ҳисобланади. Аргентиналик футболчи 86та зарба бериб, 13та гол уришга муваффақ бўлди (самарадорлик — 19%). Лекин Месси Роналдуга нисбатан 4та ўйин кўпроқ майдонга тушганини таъкидлаш лозим. Карим Бензема эса 21та зарбанинг 2тасини голга айлантирди (самарадорлик — 11%).