Осиё чемпионлар лигасининг 2018 йилги мавсуми бошланиши олдидан ўзбек клублари учун ажойиб ҳолат юзага келди. Яна ҳам аниқроғи, "Насаф" ва "Пахтакор" клублари гуруҳ босқичи йўлланмасини қўлга киритиш учун яхши имкониятга эга бўлишди.

Гап шундаки, Саудия Арабистони гуруҳ босқичида фақат 2та жамоа билан иштирок этадиган бўлди. Улар — "Ан-Наср" ва "Ал-Иттиҳод". Саудия чемпионатида 3 ва 4-ўринни эгаллаган жамоалар ОФКдан тегишли лицензияни қўлга кирита олишмади. Уларнинг ўрнига бошқа жамоалар иштирок этмайдиган бўлди. Шу боис, гуруҳ босқичи ва саралаш босқичидан биттадан ўрин бўшаб қолди. Шу боис, Эрон ва Қатарнинг ОЧЛдаги квоталари "2+2"дан "3+1"га кўпайтирилди.

Ундан ташқари, Сурия ва Ироқ мамлакатлари ОЧЛ талабларини бажара олмагани учун мусобақада иштирок этмайдиган бўлди. Кувайт эса ФИФА аъзолигидан четлатилгани боис, унинг клублари халқаро мусобақаларда иштирок этиш ҳуқуқига эга эмас.

Натижада Ғарб минтақасида гуруҳ босқичига бериладиган 4та йўлланма учун 8та клуб кураш олиб борадиган бўлди. Демак, "Насаф" ўз майдонида Иорданиянинг Ал-Файсалий" жамоасини қабул қилади. "Аждарлар" 30 январь куни бўладиган ўйинда иорданияликларни мағлуб этишса, гуруҳ босқичи йўлланмасини қўлга киритишади.

"Пахтакор" ҳам битта ўйин орқали гуруҳ босқичига чиқиши мумкин. Бунинг учун Арвеладзе шогирдлари Қатарда "Ал-Ғарафа"ни мағлуб этишлари талаб этилади. Бу ўйин ҳам 30 январга белгиланган.

"Локомотив" эса ўз иштирокини тўғридан-тўғри гуруҳ босқичидан бошлашидан хабарингиз бор.

Дарвоқе, бугун ОЧЛ гуруҳ босқичига қуръа ташлаш маросими бўлиб ўтади.