«Реал» клуби ва Португалия терма жамоаси ҳужумчиси Криштиану Роналду ижтимоий тармоқлар орқали, Мьянманинг Аракан вилоятида истиқомат қилувчи Роҳингя халқи қочқинлари болаларини қўллаб-қувватловчи хабарни тарқатди.

Маълумки, Роналду бутун дунёда болалар ҳуқуқини муҳофаза қилиш билан шуғулланувчи «Болаларни асранг» халқаро ташкилотини қўллаб-қувватлаб келади.

Бу сафар машҳур футболчи Роҳингя мусулмонларига нисбатан қилинаётган зўравонликларга эътиборни жалб қилишга уриниб кўрди.

«Дунё болаларига тинчлик ва муҳаббатни берайлик. Илтимос, уларга ёрдам беринг», - деб ёзди Роналду ижтимоий тармоқларда.

Хабар #Rohingya ва #Refugee ҳештеглари, шунингдек, Роналдунинг тўрт нафар болакай билан тушган фотосурати билан жойлаштирилди. Шунингдек, футболчи бола кўтариб турган Роҳингя мусулмони фотосуратини ҳам тақдим қилди.

Аввалроқ, «Болаларни асранг» ташкилоти лойиҳаси доирасида, Роналду суриялик болакайларни қўллаб-қувватлаган эди.