«Real» klubi va Portugaliya terma jamoasi hujumchisi Krishtianu Ronaldu ijtimoiy tarmoqlar orqali, Myanmaning Arakan viloyatida istiqomat qiluvchi Rohingya xalqi qochqinlari bolalarini qo‘llab-quvvatlovchi xabarni tarqatdi.
Ma’lumki, Ronaldu butun dunyoda bolalar huquqini muhofaza qilish bilan shug‘ullanuvchi «Bolalarni asrang» xalqaro tashkilotini qo‘llab-quvvatlab keladi.
Bu safar mashhur futbolchi Rohingya musulmonlariga nisbatan qilinayotgan zo‘ravonliklarga e’tiborni jalb qilishga urinib ko‘rdi.
«Dunyo bolalariga tinchlik va muhabbatni beraylik. Iltimos, ularga yordam bering», - deb yozdi Ronaldu ijtimoiy tarmoqlarda.
Xabar #Rohingya va #Refugee heshteglari, shuningdek, Ronalduning to‘rt nafar bolakay bilan tushgan fotosurati bilan joylashtirildi. Shuningdek, futbolchi bola ko‘tarib turgan Rohingya musulmoni fotosuratini ham taqdim qildi.
Avvalroq, «Bolalarni asrang» tashkiloti loyihasi doirasida, Ronaldu suriyalik bolakaylarni qo‘llab-quvvatlagan edi.
