«Динамо» - «Сурхон» (1:0) учрашувидан кейин мезбонлар бош мураббийи Даврон Файзиев ўйиндан кейинги фикрлари билан ўртоқлашди.

- “Динамо” ва “Сурхон” ўртасидаги олдинги учта баҳс ҳам муросасиз ва шиддатли ўтган эди. Бу сафар ҳам ўйин анча томошабоп бўлди. “Сурхон” билан баҳсда бу жамоани мағлуб этиб, уч очко олишимиз шарт эди. Акс ҳолда юқори ўринлар учун курашдан четда қолишимиз мумкин эди. Жуда муҳим ғалабага эришдик.

“Сурхон”га қарши ушбу ўйиннинг олдингиларидан фарқи шунда бўлдики, аввалги ўзаро учта ўйинимизда Самарқандда ҳам, Термизда ҳам чиройли ўйнаб, майдонда устунлик қилган бўлсакда, мағлуб бўлгандик, Термизда дуранг ўйнаб очко йўқотгандик.

Бу сафар тенгкурашлар остида, майдонда катта устунликка эришмай, сўнгги дақиқада ғалабани илиб кетдик. Умуман олганда, омад бугун биз томонда бўлди. Сабаби, “Сурхон” жарима зарбасидан кейин ҳисобни очишга яқин эди – тўп дарвоза тўсинига тегди.

Қолаверса, иккинчи бўлимда яққол голли вазиятни ҳимоячи ва дарвозабонимиз бартараф эта олишди. Якунда эса футболчиларимиз яхши имконият яратиб, голга айлантиришди.

Аввалги гапимни яна такрорлайман, биз ҳар қандай ҳолатда ҳам Суперлига йўлланмаси учун охиригача курашишда давом этамиз.