«Dinamo» - «Surxon» (1:0) uchrashuvidan keyin mezbonlar bosh murabbiyi Davron Fayziyev o‘yindan keyingi fikrlari bilan o‘rtoqlashdi.

- “Dinamo” va “Surxon” o‘rtasidagi oldingi uchta bahs ham murosasiz va shiddatli o‘tgan edi. Bu safar ham o‘yin ancha tomoshabop bo‘ldi. “Surxon” bilan bahsda bu jamoani mag‘lub etib, uch ochko olishimiz shart edi. Aks holda yuqori o‘rinlar uchun kurashdan chetda qolishimiz mumkin edi. Juda muhim g‘alabaga erishdik.

“Surxon”ga qarshi ushbu o‘yinning oldingilaridan farqi shunda bo‘ldiki, avvalgi o‘zaro uchta o‘yinimizda Samarqandda ham, Termizda ham chiroyli o‘ynab, maydonda ustunlik qilgan bo‘lsakda, mag‘lub bo‘lgandik, Termizda durang o‘ynab ochko yo‘qotgandik.

Bu safar tengkurashlar ostida, maydonda katta ustunlikka erishmay, so‘nggi daqiqada g‘alabani ilib ketdik. Umuman olganda, omad bugun biz tomonda bo‘ldi. Sababi, “Surxon” jarima zarbasidan keyin hisobni ochishga yaqin edi – to‘p darvoza to‘siniga tegdi.

Qolaversa, ikkinchi bo‘limda yaqqol golli vaziyatni himoyachi va darvozabonimiz bartaraf eta olishdi. Yakunda esa futbolchilarimiz yaxshi imkoniyat yaratib, golga aylantirishdi.

Avvalgi gapimni yana takrorlayman, biz har qanday holatda ham Superliga yo‘llanmasi uchun oxirigacha kurashishda davom etamiz.