Мана, ҳаш-паш дегунча Ўзбекистон миллий терма жамоасининг Туркиядаги йиғини ҳам охирлаб қолди. Биламизки, бу ўқув-машғулот йиғини терма жамоамиз учун Осиё кубоги олдидан сўнггиси ҳисобланади ва айнан Анталияга сафардан кейин БААга йўл оладиган асосий таркиб эълон қилинади. Жорий мавсум якунларига кўра, Суперлиганинг энг яхши дарвозабони деб топилган (энг кўп қуруқ ўйин, энг кам гол ўтказган) Элдор Суюнов эса ҳозирча жароҳатини даволаш билан банд бўлгани боис, сафардан четда қолиб кетди. Маълумот ўрнида айтиш лозим, тажрибали посбон «Пахтакор» машғулотида қўл панжасини синдириб олганди ва Элдорбек декабрь ойининг сўнгги ўн кунлигида машғулотга қайтиши кутилмоқда. Терма жамоа шифокори Аброр Пирриевнинг айтишича, Суюнов қитъа чемпионатига қадар тикланишга улгурар экан. Биз Элдорга тезроқ соғайиб кетишини тилаган ҳолда, уни суҳбатга тортдик.
- Элдорбек, очиғини айтганда, бу йилги мавсум «Пахтакор» учун аламли келди. Чунончи, чемпионлик кураши бой берилди, кубок финалида ҳам омад сизлардан юз ўгирди. Умуман олганда, 2018 йилги мавсумга қандай таъриф берган бўлар эдингиз?
- Ҳа, биз учун мавсум омадсиз келди. Осон ўйинлар деярли бўлмади, ҳисоб. Барча учрашувларда очколарни катта қийинчилик билан қўлга киритдик. Энг ёмони, мавсум аввалида жамоа олдига қўйилган вазифаларни бажара олмадик. Табиийки, бундай ҳолатда мавсумга ижобий таъриф бериб бўлмайди. Жуда ҳам аламли якун бўлди. Лекин бу ҳам биз учун, жамоа учун бир сабоқ. Бу йилги иштирокимиздан ўзимиз учун керакли хулосани чиқариб оламиз ва умид қиламан, келгусида бундай хатоларни такрорламаймиз.
- Сизнингча, режаларнинг бузилишига нима сабаб бўлди?
- Ҳеч бир воқеа ўз-ўзидан содир бўлмайди. Бошқача айтсам, омадсизликка учрадикми, демак, бунда бутун жамоа айбдор. Чунки футбол - жамоавий ўйин ва бунда бир кишини айблаш ноўрин.
- Адашмасак, чемпионлик тақдири «Локомотив»га 1:3 ҳисобида бой берилган ўйинда ҳал бўлиб улгурди...
- Шундай деса ҳам бўлади. Зеро ўша учрашувдан кейин фақат назарий жиҳатдангина чемпионлик учун имкониятимиз сақланиб қолганди, холос. Амалда эса ана шу кичик имкониятни амалга оширишнинг деярли иложи йўқ эди. Буни ҳамма тушуниб турганди. «Локомотив» эса хатоларни кечирадиган жамоа эмас.
- Ўша учрашувга жамоа руҳан тайёр эмасмиди?
- Биласизми, бу - футбол! Ҳеч ким майдонда нима бўлишини олдиндан аниқ айтиб бера олмайди. Ҳа, тахминлар билдирилади, имкониятлар чамаланади. Лекин одатда, икки кучли жамоа ўйнаётган пайтда тахминлар ўзини унчалик оқламайверди. Агар ғалаба қозонсангиз, ҳаммаси тўғри бажарилгандек бўлиб чиқади. Акси бўлса-чи, унда ҳамма қилган ишингиз хатога чиқади.
- «Локомотив» билан меҳмондаги ўйиндан олдин ҳам назарий жиҳатдан «Пахтакор»нинг имконияти сақланиб қолганди. Лекин учрашувда «шерлар»га ишонч етишмаётгандек туюлди...
- Йўқ, бу фикрингизга қўшилмаган бўлардим. Чунки бизда умид охиригача бор эди ва сақланиб турди. Аслида ўша куни ҳаммамиз «Бугун йирик ҳисобда ғалаба қозонишимиз керак», деган фикр билан майдонга тушгандик. Айнан мана шу фикр ўйиннинг бошидан то охиригача бизни катта босим остида ушлаб турди. Тўғри, бу гапим билан «Локомотив» кучсиз эди, демоқчи эмасман. Тан олиш керак, жорий мавсумдаги «Пахтакор» - «Локомотив» қарама-қаршиликларида «темирйўлчилар» нисбатан кучлироқ кўринишди.
- Кубок финалидаги мағлубиятни эса ҳеч ким кутмаганди. Табиийки, «Пахтакор» футболчилари ҳам. Ўзи нима бўлганди?
- Ҳа, бундай якунни ўзимиз ҳам кутмагандик... Ютишимиз шарт бўлган ўйинда мағлуб бўлдик. Наилож, ҳаёт давом этади.
- АГМК футболчилари билан суҳбатлашганимизда, улар рақибнинг хотиржамликка берилгани бизнинг фойдамизга хизмат қилди, деган фикрни айтишди. Сизнингча, финалдаги мағлубиятнинг асл сабаби нимада?
- Аниқ сабабини билмайман. Балки, чиндан ҳам хотиржамликка берилгандирмиз. Ёки майдонда рақиб жамоани менсимадикми, тўғриси, билмадим. Лекин нима бўлишидан қатъий назар, финал учрашувида ғалаба қозонишимиз шарт эди.
- Бу йил чемпионатимиз янгича форматда ўтказилди. Икки босқичда ўтган Суперлига шахсан сизга маъқул келдими? Ёки аввалги стандарт - икки даврали тизим яхши эдими?
- Бу форматдаги чемпионат олдин ҳам кўп давлатларда қўлланилган ва кейинчалик нотўғри деб топилган. Ўйлашимча, бизда ҳам бу янгича формат узоқ сақланиб қолмайди ва камида аввалгисига ўзгартирилади.
- Демоқчисизки, чемпион ва совриндорлар номини аниқлаш учун холислик етишмайди?
- Йўқ, гап унда эмас. Шунчаки, бу форматди ўткинчи ўйинлар кўп бўлади. Амалда ҳам шундай бўлди-ку, тўғрими?
- Бу йилги ҳакамлик ўтган йилларга нисбатан яхшироқ бўлди, дейишяпти. Сиз ҳам бу фикрга қўшиласизми?
- Менимча, ҳар доимгидек. Катта ўзгариш сезмадим.
- Жароҳатни даволаш қандай кечяпти? Шифокорлар қачон майдонга қайтишингизга рухсат беришади?
- Ҳозирча ҳаммаси режа асосида кетмоқда. Янги йилдан сўнг умумий гуруҳда машғулотларни бошласам керак. Лекин барибир ҳаммаси такрорий текширувдан сўнг ойдинлашади. Балки, машқларга кутилганидан кўра эртароқ киришарман... Ҳар ҳолда шундай бўлишига умид қиляпман. Олдинда Осиё кубоги бор. Қитъа чемпионати бошланишига эса ҳеч қанча вақт қолмади. Имкон қадар тезроқ сафга қайтишга ҳаракат қиляпман.
