Сўнгги муҳим ўйинларда «Қироллик клуби» мағлубиятлар кўчасига кириб қолди. Клублар ўртасидаги энг нуфузли турнирда 3 бор кетма-кет чемпионликдан сўнг  клуб ЙЧЛ билан хайрлашди. Бунга ўртамиёна «Аякс» кўмаклашиб юборди.
Зидан ва Роналдо кетгач, «Реал Мадрид» сезиларли даражада кучсизлашиб қолди. Бугун «Реал Мадрид» жамоасининг муаммоси нимада эканлигини таҳлил қилиб кўрамиз

Ёши ўтиб қолган футболчилар

«Реал Мадрид»нинг ЙЧЛни кетма-кет қўлга киритган таркибига яхшилиаб назар солинг: Тони Кроос 30 ёш, Серхио Рамос 33 ёш, Модрич 34 ёш, Бейл 30 ёш, Бензема 32 ёш, Кейлор Навас 33 ёш, Марселло 31 ёш, Начо Фернандез 30 ёш, Каземиро 28 ёш, Роналдо 34…

Эътибор берилса, «Реал Мадрид»нинг кетма-кет чемпионлик шоҳсупасига олиб чиққан футболчиларнинг ёшлари анча ўтиб қолди. Бундан ташқари бу футболчилар клублар ўртасида қандай совринлар бўлса, деярли ҳаммасида ғолиб чиқишди. Ўз-ўзидан мотивациянинг кескин тушиб кетиши одатий холат. Виниcиус Жуниор, Асенсио, Регилон сингари ёшларнинг ғалабага чанқоқлиги эса катта зафарлар учун етарлича бўлмаслиги аниқ. Клуб ҳозирда авлодлар алмашинувини бошидан ўтказиш арафасида турибди. Бу ҳолат осонлик билан ўтиб кетмайди ва ўйинлар сифатига ҳам таъсир этмасдан қолмайди.

Роналдунинг кетиши

«Реал Мадрид»нинг  бу мавсумдаги омадсиз ўйинларини жуда кўпчилик Роналдунинг кетгани билан боғламоқда. Аслида, ҳам шундайми? Ўйлаб қаралса, португалиялик афсонанинг клубда тутган ўрни беқиёс эди. Ҳар мавсумда 50 та гол урадиган футболчининг ўрни ҳар қандай клубда билиниб қолиши оддий ҳолат. Роналдонинг жамоадан кетишига асосий сабаблардан бири бу - собиқ жамоадошларида мотивациянинг қолмагани десак, адашмаган бўламиз. Роналду ўз даромадининг катта қисмини  имиджи ва реклама агентликлари орқали олиши ҳеч кимга сир эмас. Роналду жамоадошларидаги ғалабага чанқоқлик йўқолишини сезиши биланоқ, жамоани тарк этди. У туғма чемпион ва доим 1-ўрин учун курашди. Тўғри, «Ювентус» сафида ЕЧЛда ғалаба қозониш бироз қийиндек кўринмоқда, аммо «Юве» ҳали турнирдан чиқиб кетганича йўқ ва уларда имконият сақланиб турибди.

Роналду жамоадан кетгач, бу ҳолат «Реал Мадрид»нинг ўйинига ва руҳий ҳолатига яхшигина зарба бўлди деб бемалол айта оламиз. Сабаби яхши футболчиларнинг ўрни доимо улар кетгачгина сезилади…

Флорентина Перезнинг хатолари

Тан олиш керак Перез жаноблари «Реал Мадрид» учун катта ҳажмдаги ишларни амалга оширди. Деярли ҳамма совринларни қўлга киритишга муваффақ бўлди. Шунга қарамасдан қаҳрамонимиз сўнгги йилларда кетма-кет хатоларга йўл қўйди ва жамоани кучсизланишига ўзи истамаган ҳолда сабаб бўлди. Қуйида унинг хатоларини санаб ўтамиз

1- Ажойиб ўйинлар кўрсатаётган, энг қийин чоғларда жамоанинг жонига оро кирган дарвозабоннинг ўрнига иқтидорли, аммо ёш Куртуанинг олиб келиниши.

2- Бир неча йиллардан бери жароҳатлар гирдобига тушиб қолган Бейлнинг ва Роналдодек футболчиларга ўз вақтида ўринсбосар тайёрлай олмагани.

3-Зидандан сўнг катта тажрибага эга бўлмаган мураббийларни таваккал тайинлаб клуб обрўсининг кескин тушишига сабаб бўлди.

4- Чинакам гол машинасига айланган Роналдонинг жамоада олиб қолиш учун ҳеч қандай чора кўрмагани эса ҳамма хатоларнинг бирданига юзага отилиб чиқишига сабаб бўлди.

5-Роналдо кетгач, зудлик билан унинг ўрнини тўлдира олмади ва Мариано Диазга унинг рақамини топширди. Ваҳоланки, бу рақам учун муносиб футболчиларни олиб келиш учун унда имкон ҳам, вақт ҳам етарли эди.

Авлодлар алмашинуви

Футбол - қизиқ олам, унинг ўзига яраша ёзилмаган қонун-қоидалари мавжуд. Ана шундай қоидалардан бири бу - авлодлар алмашинуви. «Реал Мадрид» ўз даражасига чиқиб олиш учун бу ҳолатни бошидан ўтказишга мажбур. Шунга қарамай, ҳурсанд қилувчи омиллар ҳам йўқ эмас. Клуб агар Винсиуснинг шаклланиб боришини таъминлай олса, у келажакда Роналдо, Месси сингари 1-рақамли футболчига айлана олади. Биласизми, нега уни «Қироллик клуби» мухлислари бу қадар тез ёқтириб қолишди? Сабаби унда, унинг кўзларида ғалабага чанқоқлик шундоқ кўриниб турибди. У ҳали футбол оламида ўз сўзини айтганича йўқ, У ҳали «Ла Лига»да ҳам ғолиблик таъмини тотиб кўрмади. Илк ЙЧЛсидан чиқиб кетганида эса қандай кўз ёш тўкканини бутун дунё кўрди. Бу футболчи атрофида янги жамоа тузилса, ўйлашимча, келажакда яхши натижалар қайд этиш мумкин. Зеро, Винисуиснинг потенцияли бунга етади.

Буюк клуб

«Реал Мадрид» ўз тарихи, миллионлаб мухлислари, обрў- эътиборига эга клуб. У Роналду  ёки Зидан ёрдамида буюкликка эришди дейиш ноўрин. Аксинча, бу клуб кўплаб юлдузларни буюклар сафига қўшди. Бир асрлк урф-одатига эга клуб нималарни кўрмади дейсиз?! Гоҳида кескин пасайиш, гоҳида сайёрамизнинг энг кучли клуби номини қайтариб олди. Ҳозирги тушкун вазият эса ўткинчи ҳолат. Ҳар қандай буюк клублар ўз тарихида бир неча бор шундай ҳолатга тушиб қолишган ва ундан мардонавор чиқиб кетишни уддалашган. Уларнинг буюклигининг сабаби ҳам мана шундадир, балки?! Мен ишонаман, «Реал Мадрид» тез орада ўз тахтига қайтади ва буюк клуб эканлигини ҳаммага яна бир бор исботлайди!

Яҳёхўжа Улуғхўжаев