Хабарингиз бор, шу йилнинг 22-26 март кунлари Тошкентда U-23  Осиё чемпионати саралашининг «F» гуруҳидан ўрин олган учрашувлар бўлиб ўтади.  Мазкур саралаш баҳсларида Ўзбекистон олимпия терма жамоаси билан биргаликда Тожикистон ва Ҳиндистон терма жамоалари ҳам иштирок этишади.    

Бугун ана шу саралаш ўйинлари олдидан учта терма жамоа бош мураббийлари иштирокида матбуот анжумани бўлиб ўтди. 

Мазкур матбуот анжуманида Ҳиндистон ОТЖ бош мураббийи фикрлари билан бўлишди.

“Тошкентда бўлиб ўтадиган саралаш баҳслари олдидан Қатарда йиғин ўтказдик. Қатар терма жамоаси билан назорат ўйинида майдонга тушдик. Тайёргарлик учун кўп вақт бўлмади. Шунга қарамай, Осиё чемпионати йўлланмасини қўлга киритиш учун бор кучимиз билан ҳаракат қиламиз.

Таркибимизда кўплаб ёш футболчилар бор. Уларга ишонч билдириб, майдонга туширмоқчимиз. Саралашдаги рақибларни видеоёзувлар орқали ўрганиб чиқдик. Ўзбекистон мусобақанинг амалдаги чемпиони. Тожикистон ҳам анча шаклланган терма жамоа. Шу сабабли уларга қарши ўйинлар осон бўлмаслиги аниқ.

Покистон терма жамоаси келганида битта ўйин кўпроқ ўтказардик. Эндиликда Осиё чемпионати йўлланмаси учун кураш фақат иккита ўйинда кечади. Биз мусобақани ижобий натижа билан якунламоқчимиз”.