Жорий ҳафтада ўзбек теннисчилари Франция, Тожикистон ва Қозоғистонда ўтадиган халқаро турнирларда мамлакатимиз шарафини ҳимоя қилади.   Тожикистоннинг Душанбе шаҳри мезбонлик қиладиган ўсмирлар ўртасидаги "J5" мусобақасида Азиз Дадабоев, Максим Шин, Бердиёр Мавлонов, Самандар Абдумаликов, Абдусамад Усмонов, Саид Акбаров, Исфандиёр Маҳмудов ва Лазизбек Қурбонов кортга чиқади. Қизлар ўртасида эса Севиль Юлдошева, Сетора Нормуродова, Анжелина Фольц, Моҳинур Шарипова, Дарья Корнилова ва Фарида Маримова каби теннисчилар ўз омадини синаб кўради.   Қозоғистоннинг Чимкент шаҳрида бошланган "Челленжер" турнирида эса Санжар Файзиев, Ҳумоюн Султонов ва Сергей Фомин каби теннисчиларимиз бош соврин учун яккалик ва жуфтлик баҳсларида кортга чиқади. Унда Сергей мисрлик Карим Муҳаммад Маамун билан куч синашса, Ҳумоюн венгриялик Зомбор Пиросни синовдан ўтказади. Санжарнинг илк учрашуви ҳиндистонлик Аржун Кадега билан бўлади.   Мамлакатимизнинг биринчи рақамли теннисчиси Денис Истомин эса Франциядаги "Челленжер" турнирида ўз иштирокини тўғридан-тўри иккинчи даврадан бошлайди.