"Барселона" сардори Лионель Месси 2020 йилнинг ёзида клуб билан тузилган шартномани бекор қилиш ҳуқуқига эга. Шу билан биргаликда, аргентиналик футболчи бунинг учун жамоага компенсация тўламайди.
El Pais нашри тарқатган хабарга кўра, Месси ва "Барса" ўртасида тузилган амалдаги шартномада келишувни муддатидан аввал бекор қилиш мумкинлиги ҳақида банд мавжуд. Ушбу шартнома 2021 йилга қадар тузилган.
Аввалроқ "Барселона" президенти Хосеп Бартомеу аргентиналик футболчи билан шартномани узайтиришга ваъда берган эди.
Ҳозирда 32 ёшли футболчи жароҳатидан тикланмоқда. Месси ўтган мавсумда барча мусобақалар доирасида "Барса" сафида 50та ўйинда майдонга тушиб, 51та гол урди ва 22та голга узатма берди.