Кеча старт олган 23 ёшгача бўлган футболчилар ўртасидаги қитъа биринчилига бўлган эътибор жуда катта. Ушбу мусобақа 4-маротаба ташкиллаштирилаётган бўлиб, илк биринчиликка 2013-йили Уммон давлати мезбонлик қилган эди. Бугун ушбу мусобақа ҳақидаги қизиқарли маълумотлар билан қисқача таништириб ўтамиз.
2013 йил Уммон
AFC ташаббуси билан илк бор ташкиллаштирилган мусобақада ҳамюртларимиз ўлим гуруҳидан жой олишгани кўпчиликнинг ёдидан кўтарилмаган бўлса, ажаб эмас. Мусобақага терма жамоамиз Алексей Евстафеев қўл остида тайёргарликни бошлайди ва саралаш учрашувларидан муваффақиятли тарзда ўтиб мусобақанинг финал қисмига етиб келади. Энг қизиғи шундаки, 2013-йилда терма жамоамиз мураббийи ўз ўрнини Шухрат Мақсудовга бўшатиб беради. Айнан Мақсудов қўл остида мусобақада иштирок этган Ўзбекистон олимпиячилари Жанубий Корея, Япония ва Сурия терма жамоалари билан бир гуруҳда кураш олиб боришади ва гуруҳ босқичини 3-ўрин билан якунлашади. Терма жамоамизнинг омадсиз иштирокидан сўнг, 2015-йилнинг 18 февраль санасида Мақсудов истеъфога чиқарилади.
Уммон қироллигида бўлиб ўтган мусобақанинг финал учрашувида Ироқ саудия арабистонилик тенгдошлари устидан 1:0 ҳисобида зафар қучади. 3-ўрин учун бўлган баҳсда эса, иорданиялик футболчилар Жанубий Корея билан тўқнаш келади. Ўйиннинг асосий вақтида ҳисоб очилмагач, пенальтилар сериясида Иордания рақибини 3:2 ҳисобида таслим қилади ва мусобақанинг бронза медалларига эга чиқади.
2016 йил Қатар
Олдингисидан фарқли ўлароқ, Қатарда бўлиб ўтган бу мусобақада Бразилияда бўлиб ўтган “Рио Олимпиада”си учун 3 та йўлланма ўйналган эди. Афсуски, бу сафар ҳам терма жамоамиз анчайин мураккаб гуруҳга тушиб қолган эди. Жанубий Корея, Ироқ ва Яман олимпиячиларига қарши тўп сурган Самвел Бабаян шогирдлари учун омадсиз келди. Аввалига 1:2 ҳисобида Жанубий Кореядан мағлубият қабул қилинган бўлса, ироқлик олимпиячилар ҳам бизни 3:2 ҳисобида мағлуб қилишни уддалашган. Оқибатда, яна гуруҳда 3-ўринни олганча, ортга қайтишга мажбур бўлган эдик.
Ўша мусобақанинг финал учрашувида Жанубий Корея ва Япония терма жамоалари тўқнаш келишади. Қизиқарли ўтган финал учрашуви "кунчиқар юрт" вакилларининг 3:2 ҳисобидаги ғалабаси билан якунланади. Финалданда муҳимроқ аҳамият касб этган 3-ўрин учун баҳсда Мезбонлар Ироқ олимпиячиларига (1:2) имкониятни бой бериб қўйишади. Оқибатда, Рио шаҳрида бўлиб ўтган Олимпиадага Жанубий Корея, Япония ва Ироқ олимпия терма жамоалари йўлланмани қўлга киритишади.
2018 йил Хитой
Чин юртида бўлиб ўтган мусобақада Олимпияда йўлланмалари ўйналмаган бўлса-да, мухлисларимизнинг ёдида ширин хотира сифатида сақланиб қолиниши турган гап. Равшан Ҳайдаров бошчилигидаги терма жамоамиз турнирни қатарлик тенгдошларидан мағлуб бўлиш билан бошлаганига қарамай, гуруҳдаги қолган иккита учрашувда ғолиб чиқишни уддалашади ва илк бор мусобақанинг плей-офф босқичига йўлланма олишади.
Аввалига Япония устидан йирик 4:0 ҳисобида зафар қучган бўлсак, финал остонасида Жанубий Кореяни 4:1 натижаси билан мағлубиятга учратган ҳолда финал йўлланмасини қўлга киритган эдик. Кучли қор ёғишига қарамай ўтказилган ўйиннинг асосий вақти 1:1 натиаси билан тугаган бўлса, қўшимча таймларнинг иккинчисининг сўнгги дақиқасида олимпиячиларимиз Сидоровнинг голи эвазига Кубокни рақибдан юлқиб олган эди. 3-ўрин учун кечган баҳсда Қатар кореялик тенгдошлари устидан минимал ҳисоб билан ғолиб чиққан ва мусобақанинг 3-ўринини қўлга киритган эди.
