Спорт арбитраж суди (CAS) «Милан» ҳужумчиси Рафаэл Леауга собиқ жамоаси — «Спортинг» фойдасига 16,5 млн евро компенсация маблағини тўлаш вазифасини юклади.
Чунки португалиялик футболчи 2018 йилнинг ноябрь ойида лиссабонликлар билан тузилган шартномани бир томонлама бекор қилиб, шундан сўнг эркин агент сифатида Франциянинг «Лилль» сафига ўтиб кетган эди. 20 ёшли футболчи 2019 йилнинг ёзида 35 миллион евро эвазига «Милан»га келиб қўшилди.
Шартнома бир томонлама бекор қилингани учун «Спортинг» CASга мурожаат қилиб, 45 миллион евро компенсация маблағини ундириш ҳақида сўров киритди. Аммо суд футболчининг трансфер бозоридаги ҳозирги нархини инобатга олиб, клуб фойдасига 16,5 млн. евро ундириш ҳақида қарор чиқарди.