Дунёдаги ҳолат ҳақида эслатишга ҳожат йўқ. Футболга келсак, кўриб ўрганиб қолганимиз Европанинг йирик лигаларидан бирор ишончли хабарлар ҳозирча келмаяпти. Аксари миш-миш даражасидаги гаплар. Баъзи чемпионатларда ташкилотчилар ҳукуматдан илгари ниятларини эълон қилиб, кейин давлат даражасидаги қарорга бўйсунишга мажбур бўлишмоқда. Хуллас, вазият чигал.

Ҳозир айтмоқчи бўлганим Руминия чемпионатига оид ҳолат ва у ҳам ҳали расмий хабар эмас, аммо, қизиқ туюлгани учун четлаб ўтолмадим.

Демак, Руминия чемпионатида мавсумнинг қолган қисми Туркияда ўтказилиши мумкин!

Агар Туркиядаги коронавирус тарқалиши кўрсаткичларидан келиб чиқиб қаралса – касалланганлар сони энг кўп бўлган 10 давлатдан бири экани боис бу танлов ақлга зиддек туюлади. Бироқ, руминларнинг мантиғи шундан иборатки, Туркия, хоссатан, Анталия соҳил бўйлари хавфсизликни таъминлаш учун энг қулай танлов. Бу ерда меҳмонхоналар кўп ва айни дамда улар моливий жиҳатдан жуда қулай таклифлар мавжуд. Руминия чемпионатининг қолган 8 тури айнан Анталияда ўтказилиши ташкилотчиларга умумий – 2 миллион еврога тушиши мумкин. Аммо, бу мазкур маблағдан икки-уч баробар кўпроқ зарарни четлаб ўтиш имконини беради. Режага кўра, яқин икки ҳафтада барча жамоалар чартер рейслар орқали Туркияга етказилади. Ва меҳмонхоналарда максимал хавфсизлик чоралар кўрилади.

Мендан сўрасангиз, бу ўта қийин вазифа, аммо, бундай уринишлар бўлиб турибди. Масалан, Дана Уайтнинг UFC 249 турнирини ўтказишга уринишларини эсланг. У дастлаб уддалай олмаган эди. Мана ҳозир яна 10 май санасидаги режалар билан қайта уриниб кўради.

Бу тиниб-тинчимаган ташкилотчилар ўз мақсадига етармикан?! Кўрамиз, кузатамиз!