Dunyodagi holat haqida eslatishga hojat yo‘q. Futbolga kelsak, ko‘rib o‘rganib qolganimiz Yevropaning yirik ligalaridan biror ishonchli xabarlar hozircha kelmayapti. Aksari mish-mish darajasidagi gaplar. Ba’zi chempionatlarda tashkilotchilar hukumatdan ilgari niyatlarini e’lon qilib, keyin davlat darajasidagi qarorga bo‘ysunishga majbur bo‘lishmoqda. Xullas, vaziyat chigal.

Hozir aytmoqchi bo‘lganim Ruminiya chempionatiga oid holat va u ham hali rasmiy xabar emas, ammo, qiziq tuyulgani uchun chetlab o‘tolmadim.

Demak, Ruminiya chempionatida mavsumning qolgan qismi Turkiyada o‘tkazilishi mumkin!

Agar Turkiyadagi koronavirus tarqalishi ko‘rsatkichlaridan kelib chiqib qaralsa – kasallanganlar soni eng ko‘p bo‘lgan 10 davlatdan biri ekani bois bu tanlov aqlga ziddek tuyuladi. Biroq, ruminlarning mantig‘i shundan iboratki, Turkiya, xossatan, Antaliya sohil bo‘ylari xavfsizlikni ta’minlash uchun eng qulay tanlov. Bu yerda mehmonxonalar ko‘p va ayni damda ular moliviy jihatdan juda qulay takliflar mavjud. Ruminiya chempionatining qolgan 8 turi aynan Antaliyada o‘tkazilishi tashkilotchilarga umumiy – 2 million yevroga tushishi mumkin. Ammo, bu mazkur mablag‘dan ikki-uch barobar ko‘proq zararni chetlab o‘tish imkonini beradi. Rejaga ko‘ra, yaqin ikki haftada barcha jamoalar charter reyslar orqali Turkiyaga yetkaziladi. Va mehmonxonalarda maksimal xavfsizlik choralar ko‘riladi.

Mendan so‘rasangiz, bu o‘ta qiyin vazifa, ammo, bunday urinishlar bo‘lib turibdi. Masalan, Dana Uaytning UFC 249 turnirini o‘tkazishga urinishlarini eslang. U dastlab uddalay olmagan edi. Mana hozir yana 10 may sanasidagi rejalar bilan qayta urinib ko‘radi.

Bu tinib-tinchimagan tashkilotchilar o‘z maqsadiga yetarmikan?! Ko‘ramiz, kuzatamiz!