«Реал» бош мураббийи Зайниддин Зидан "Squawka" нашри версиясига кўра, Европа чемпионлар лигаси тарихидаги энг яхши мураббий деб топилди. Рейтингни тузишда 1992 йил — Европа чемпионлар кубоги мусобақаси ҳозирги кўринишга ўтган даврдан бошлаб инобатга олинган.

47 ёшли Зидан рейтингдаги энг ёш мутахассис бўлиб, 2016 йилдан 2018 йилгача турнирда кетма-кет 3 марта ғолиб чиққан. Франциялик мутахассис мураббий сифатида жамоасини 40та ўйинда майдонга бошлаб тушиб, уларнинг 26тасида (65%) ғалаба қозонган.

«Манчестер Сити» устози Хосеп Гвардиола 2-поғонани забт этди. У «Барселона» билан икки марта (2009, 2011) Чемпионлар лигаси бош совринига эга чиққан. Пеп турнирда баҳсларнинг 61 фоизида ғалаба қозонган (121та ўйиндан 74тасида).

«Эвертон» бош мураббийи Карло Анчелотти кучли учликка кирди. Италиялик мутахассис ЕЧЛни «Милан» (2003, 2007) ва «Реал» (2014) билан 3 марта қўлга киритган. Унинг ғалабали ўйинлар коэффициенти 55,15 фоизга тенг бўлди (165та ўйинда 91 ғалаба).

"Тоттенхэм" бош мураббийи Жозе Моуриньо ва Луи ван Гал кучли бешликка киришган бўлса, «Манчестер Юнайтед» билан Чемпионлар лигасида икки марта (1999, 2008) ғолиб чиққан сэр Алекс Фергюсон рейтингда 6-поғонани эгаллади.

Европа чемпионлар лигаси тарихидаги энг яхши мураббийлар (топ-10):

1. Зайниддин Зидан («Реал») — 2016, 2017, 2018 йилларда ғолиб чиққан.

2. Хосеп Гвардиола («Барселона», «Бавария», «Манчестер Сити») — 2009, 2011.

3. Карло Анчелотти («Парма», «Ювентус», «Милан», «Челси», «ПСЖ», «Реал», «Бавария», «Наполи») — 2003, 2007, 2014.

4. Жозе Моуриньо («Порту», «Челси», «Интер», «Реал», «Манчестер Юнайтед», «Тоттенхэм) — 2004, 2010.

5. Луи ван Гал («Аякс», «Барселона», «Бавария», «Манчестер Юнайтед») — 1995.

6. Алекс Фергюсон («Манчестер Юнайтед») — 1999, 2008.

7. Юпп Хайнкес («Реал», «Бавария») — 1998, 2013.

8. Висенте дель Боске («Реал») — 2000, 2002.

9. Рафаэль Бенитес («Ливерпуль», «Интер», «Челси», «Наполи», «Реал») — 2005.

10. Оттмар Хитцфельд («Боруссия» Д, «Бавария») — 1997, 2001