Бугун 30 октябрь, дунё футболи афсоналаридан бири Диего Марадона ўзининг 60 ёшини қарши олмоқда.
Аргентиналик футбол афсонаси ўз юбилейига қандай совға олишни хоҳлашини Corriere dello Sport билан суҳбатда очиқлади.
"Ўзим учун ҳеч нарса керак эмас. Мен ҳалокатли пандемия йўқолиб кетишини хоҳлайман. Шунингдек, нафақат Аргентинада, балки дунёнинг бошқа давлатларида ҳам очлик ва ишсизлик йўқолиб кетишини тилайман.
Футбол ҳақида гапирадиган бўлсам, 90 йиллик танаффусдан кейин "Химнасия" клубини чемпион бўлишини хоҳлайман. Қолаверс, яқин йиллар ичида "Наполи" клуби ҳам ўз ҳисобига яна битта cкудетто қўшиб олишини тилайман. Мен "Наполи"ни кузатиб бораман ва менга улар ёқади", - деди Марадона.
Аргентиналик афсона фаолияти давомида "Барселона", "Наполи", "Севилья" ва аргентинанинг бир нечта клубларида ўйнаган. Терма жамоаси билан 1986 йили Жаҳон чемпионатини ютган.
