ЎзПФЛ 2021 йилги мавсум учун футбол клубларининг сметалари ЎФА билан келишилган ҳолда тасдиқланиши ғоясини илгари сурмоқда.
Шу кунгача сметанинг 80-90 фоизи ойлик маошлар учун сарф этилган бўлиб, моддий-техник база, пойдевор кабилар мустаҳкамланмаган. ЎФА билан келишилган сметада айнан иккинчи масала асосий планга чиқиши, ортгани эса ойлик-маошлар учун сарфланиши керак бўлади. Бунда ЎФА кимнинг қанча маош олиши масаласига аралашмайди, балки ОФК илгари сураётган лицензиялаш талабларининг бажарилиши масаласи сметада акс этишига эришади.
Бу билан келаси йилнинг октябридаёқ ОФК лицензиясини қўлга киритувчи футбол клублари сонининг сезиларли даражада ошишига эришишимиз мумкин. Бунда албатта асосий муаммо — бухгалтерия масалалари ҳам тартибли бўлишига эришиш муҳим.
Албатта бу таклиф катта маош олувчи футболчи, мураббий ёки клуб раҳбарларига хуш келмаслиги мумкин. Бироқ мана шу ўринда саволни тўғри қўйиш керак бўлади: давлат улуши 50 фоиздан ортиқроқ бўлган корхоналар томонидан молиялаштириладиган клубларнинг асосий вазифаси нимадан иборат: ишчиларига каттароқ маош қилиб беришми ёки берилган маблағдан оқилона фойдаланиб, уни футбол ривожи йўлида сарф этишми?
