O‘zPFL 2021 yilgi mavsum uchun futbol klublarining smetalari O‘FA bilan kelishilgan holda tasdiqlanishi g‘oyasini ilgari surmoqda.
Shu kungacha smetaning 80-90 foizi oylik maoshlar uchun sarf etilgan bo‘lib, moddiy-texnik baza, poydevor kabilar mustahkamlanmagan. O‘FA bilan kelishilgan smetada aynan ikkinchi masala asosiy planga chiqishi, ortgani esa oylik-maoshlar uchun sarflanishi kerak bo‘ladi. Bunda O‘FA kimning qancha maosh olishi masalasiga aralashmaydi, balki OFK ilgari surayotgan lisenziyalash talablarining bajarilishi masalasi smetada aks etishiga erishadi.
Bu bilan kelasi yilning oktyabridayoq OFK lisenziyasini qo‘lga kirituvchi futbol klublari sonining sezilarli darajada oshishiga erishishimiz mumkin. Bunda albatta asosiy muammo — buxgalteriya masalalari ham tartibli bo‘lishiga erishish muhim.
Albatta bu taklif katta maosh oluvchi futbolchi, murabbiy yoki klub rahbarlariga xush kelmasligi mumkin. Biroq mana shu o‘rinda savolni to‘g‘ri qo‘yish kerak bo‘ladi: davlat ulushi 50 foizdan ortiqroq bo‘lgan korxonalar tomonidan moliyalashtiriladigan klublarning asosiy vazifasi nimadan iborat: ishchilariga kattaroq maosh qilib berishmi yoki berilgan mablag‘dan oqilona foydalanib, uni futbol rivoji yo‘lida sarf etishmi?
