«Реал» клуби нима учун Европа суперлигаси мусобақасини ташкил қилишга қарор қилгани ҳақида баёнот берди.

«Пандемия шуни кўрсатдики, футбол пирамидасининг қадрини ошириш ва уни қўллаб-қувватлаш учун янги стратегик назар ва тижорий ёндашув зарур. Сўнгги пайтда бошқарув органлари томонидан Европадаги футбол мусобақаларининг янги формати борасида консультациялар ўтказилди. Таъсисчи-клубларнинг фикрича, бошқарув органлари томонидан таклиф этилган қарорлар учрашувларни янги савияга кўтариш ва футбол олами учун қўшимча маблағларга эга бўлиш каби фундаментал муаммоларни ҳал қилмайди», — дейилади "Мадрид" тарқатган баёнотда.

Эслатиб ўтамиз, 18 апрель куни кечаси Европанинг 12та топ-клуби — «Милан», «Арсенал», «Атлетико», «Челси», «Барселона», «Интер», «Ювентус», «Ливерпуль», «Манчестер Сити», «Манчестер Юнайтед», «Реал» ва «Тоттенхэм» янги Европа суперлигасига асос солинганини эълон қилишди.

УЕФА, ўз навбатида, Суперлигада иштирок этадиган клублар еврокубоклардан четлатилишини, унинг ўйинчилари эса терма жамоалар сафида халқаро ўйинларда қатнашишига рухсат берилмаслигини маълум қилди.