Ўзбекистон олимпия терма жамоаси бош мураббийи Вадим Абрамов "Шахтёр" устидан қозонилган ғалабадан сўнг ўз фикрларини билдириб ўтди.

— "Шахтёр" каби кучли жамоалар билан ўйнаш бизга ҳар доим ҳам насиб қилавермайди. Бу ўйинда йигитлар катта иштиёқ билан тўп суришди. Айниқса, биринчи бўлимда яхши ҳаракат қилдик. Прессинг эвазига рақибнинг ўйинини бузишга ва ўзи истагандек ўйнашига имкон бермадик. Иккинчи бўлимда вазият ўзгариб кетди. Кўп миқдордаги ўйинчи алмаштиришлар ва янги кучлар эвазига "Шахтёр" ўйин суръатини оширди ва биз ташаббусни қўлдан бой бердик. Бундай вазиятда жамоа жисмоний жиҳатдан оптимал формада эмаслиги кўриниб қолди. Шунга қарамай, футболчиларнинг қилган меҳнатларидан миннатдорман. Ғалаба қозониш ҳар доим ёқимли, айниқса, у "Шахтёр" каби юқори савиядаги жамоалар устидан.

Олдимизда "Ростов"га қарши кичик финал кутиб турибди. Бу ўйин натижасига қараб гуруҳда биринчи бўлишимиз ҳам, сўнгги ўринни эгаллашимиз ҳам мумкин. Эртага мухлислар чиройли ўйин гувоҳига айланишларига шубҳа қилмайман. "Ростов" — жуда яхши жамоа. Биз бу жамоани албатта мағлуб этишга ва ўз олдимизга қўйган вазифани бажаришга ҳаракат қиламиз. Ўйиндан ўйинга жисмоний тайёргарлигимизни ошириб борамиз ва Австралияга қарши бўладиган ўйингача жанговор ҳолатда бўламиз", — дейди Вадим Абрамов.