Элдор Шомуродовнинг бугунги ўйинидан сўнг яна ўша эски мавзу трендга чиқди.

"Элдор топ клубга ўтиши керак!"

Мухлислар ва айрим ҳамкасбларимиз бугунги рақибнинг ўзи «Аталанта» варианти ҳам ҳам яхши деган фикрни илгари суришмоқда. Албатта «Аталанта» яхши жамоа ва Чемпионлар лигасида ўйнайди. Элдорни бу турнирда кўришимиз мумкин. Аммо бергамоликларнинг услуби ва мураббийидан келиб чиқсак у ерда Элдорга осон бўлмайди деб ўйлайман. Гасперини жуда ўжар мураббий ва у билан муносабатни доим мўътадил сақлаш керак. «Аталанта» футболчилари ижодкорлик қобилятларини кўрсатиб, кўрсатмалардан чиқишни бошлашса бу нима оқибатларга олиб келиши мумкинлигини Гомес, Иличич мисолларида кўрдик. Жамоа услуби, персонал прессингда эса футболчилар жисмонан жуда кўп куч сарфлашади. Бу борада ҳам Элдор қийналиб қолиши мумкин, менимча.

Шахсий фикрим, Италияда ҳозир Шомуродов учун яхши вариантлардан бири бу — «Лацио». Римликларнинг ўйини «Женоа»никига ўхшаш ва янада такомиллашган вариантда. Симоне Индзаги жамоасининг асосий қуроли қарши ҳужум ҳисобланади. Ярим ҳимоя ва қанот яхши футболчилардан ташкил топган ва улар ҳужумга тўпни етказишда жуда тез ҳаракат қилишади. Элдорнинг тезлиги албатта бундай клубга ҳам анча ас қотиши мумкин.

Албатта «Ювентус» ва «Милан»га ҳам кейинги мавсум Элдорга ўхшаган ҳужумчи керак. Лаутаро кетса «Интер» ҳам ҳужумчига муҳтож бўлиб қолади, аммо унинг ўрнида ҳозирча шошмаган бўлардим.

Ҳасан Турдалиев.