Eldor Shomurodovning bugungi o‘yinidan so‘ng yana o‘sha eski mavzu trendga chiqdi.

"Eldor top klubga o‘tishi kerak!"

Muxlislar va ayrim hamkasblarimiz bugungi raqibning o‘zi «Atalanta» varianti ham ham yaxshi degan fikrni ilgari surishmoqda. Albatta «Atalanta» yaxshi jamoa va Chempionlar ligasida o‘ynaydi. Eldorni bu turnirda ko‘rishimiz mumkin. Ammo bergamoliklarning uslubi va murabbiyidan kelib chiqsak u yerda Eldorga oson bo‘lmaydi deb o‘ylayman. Gasperini juda o‘jar murabbiy va u bilan munosabatni doim mo‘’tadil saqlash kerak. «Atalanta» futbolchilari ijodkorlik qobilyatlarini ko‘rsatib, ko‘rsatmalardan chiqishni boshlashsa bu nima oqibatlarga olib kelishi mumkinligini Gomes, Ilichich misollarida ko‘rdik. Jamoa uslubi, personal pressingda esa futbolchilar jismonan juda ko‘p kuch sarflashadi. Bu borada ham Eldor qiynalib qolishi mumkin, menimcha.

Shaxsiy fikrim, Italiyada hozir Shomurodov uchun yaxshi variantlardan biri bu — «Lasio». Rimliklarning o‘yini «Jenoa»nikiga o‘xshash va yanada takomillashgan variantda. Simone Indzagi jamoasining asosiy quroli qarshi hujum hisoblanadi. Yarim himoya va qanot yaxshi futbolchilardan tashkil topgan va ular hujumga to‘pni yetkazishda juda tez harakat qilishadi. Eldorning tezligi albatta bunday klubga ham ancha as qotishi mumkin.

Albatta «Yuventus» va «Milan»ga ham keyingi mavsum Eldorga o‘xshagan hujumchi kerak. Lautaro ketsa «Inter» ham hujumchiga muhtoj bo‘lib qoladi, ammo uning o‘rnida hozircha shoshmagan bo‘lardim.

Hasan Turdaliyev.