Златан Иброҳимович ўйнайдиган клублар доимо чемпион бўлиши бежизга эмас. У оддий ўйинларда, кичик вазиятлардан ҳам гол ярата олади ва аслида у қадар ёрқин ўйин кўрсатмаган ҳолда жамоа керакли очколарни қўлга киритади.

Ҳозирги "Интер", "Наполи"ларда айнан мана шу жиҳат етишмаяпти ва бутун жамоа бўлиб кучли ўйин кўрсатаётган "Ювентус"ни таъқиб қилишни фақатгина "Милан" уддалай оляпти холос. 

Бу зафар ҳам ҳисобьни очиш Златанга насиб этди. 25 метрлар масофадан белгиланган жарима зарбасини яқин бурчакка йўналтирган швециялик ҳужумчи голлари сонини 17 тага етказиб, "Удинизе" сардори Ди Наталега етиб олди. Орадан бироз ўтиб эса, у жамоадоши Ночеринони қулай вазиятга чиқарди. Жарима майдонига етказиб берилган тўпни кўкраги билан Ночеринога ташлаб берди. Ярим ҳимоячининг зарбаси аниқ чиқди - 2:0.

Учинчи гол жамоа ветерани, икинчи бўлимда майдонга тушган Массимо Амброзини номига ёзилди. Тиагу Силванинг ўрнида асосий таркибда ҳаракат қилган Эмануэлсоннинг ошириб берган тўпини Амброзини жарима майдони ичида қабул қилиб олиб, ҳисобни йириклаштирди. 

Ушбу ишончли ғалабадан сўнг, "Милан" очколари сонини 43 тага етказди ва Турин клубидан атиги бир очкога ортда қолмоқда. Аммо келаси турда жамоани Римда қийин учрашув кутиб турибди. "Лацио"га қарши.  

МИЛАН - КАЛЬЯРИ– 3:0 
Голлар: 1:0 – Иброҳимович (32), 2:0 – Ночерино (39), 3:0 – Амброзини (75).
МИЛАН: Аббьяти, Абате, Неста, Мексес, Эмануэлсон, Месба, ван Боммел, Ночерино, Зеедорф (Амброзини, 67), Робиньо (ал-Шарави, 62), Иброҳимович (Индзаги, 84).
КАЛЬЯРИ: Агацци, Ф. Пизано (Рибейро, 54), Канини, Астори, Агостини, Экдаль, Наингголан (Конти, 66), Ибарбо, Коссу (ал-Кабир, 57), Дессена, Пинилья.
Огоҳлантиришлар: ван Боммел (13).