Суперлига 10-туридан ўрин олган “Навбаҳор” – “Машъал” (2:1) учрашувидан кейинги матбуот анжуманининг иккинчи қисмида меҳмонлар устози Александр Хомяков қатнашиб, журналистларнинг саволларига жавоб берди. Қуйида унинг фикрларини эътиборингизга ҳавола этамиз.

"Наманганликларни ғалаба билан табриклайман. Ўйиннинг боришидан мамнун бўлдим. Бошқача футбол намойиш этишни истагандик, аммо ўйин бошида режаларимиз амалга ошмади. Тезкор ҳужумларга ўтишни уддалай олмадик. Биринчи бўлим охирида кутилмаганда ўз дарвозамиздан тўп ўтказиб юбордик. Иккинчи гол эса қарши ҳужумда урилди. Қўпол хатога йўл қўйдик. “Навбаҳор” иккинчи бўлимда ўйин назоратини бизга топшириб, асосан ҳимояланди. Режамиз иш бермади.

Мағлубиятга учрадикми, демак, ўйин шунга лойиқ бўлди. Менимча, бугун ташаббусни осонликча бериб қўйдик. “Навбаҳор”нинг ўз дарвозасидан кам тўп ўтказиб юборгани, ҳимояда яхши ўйнашини билдиради. Ҳимоядан ўйнаб, бўш ҳудудларга очилиб, ҳужум уюштиришга интилади. Бизда ҳам ҳимоядан ҳужумга ва аксинча, ҳужумдан ҳимояга ўтишда аниқ ўйнашимиз талаб этилади. “Навбаҳор” айнан ҳужумдан ҳимояга ўтишда тезкор ҳаракатланди. Умуман олганда, пенальтини инобатга олганда, бизда ҳам айтарли вазият яратилмади. Мезбонлар таркибида тажрибали, футбол ўйнашни биладиган футболчилар жамланишган. Бугун биз жуда кўп яккакурашларни бой бердик", — деди Хомяков.

“Навбаҳор” ПФК матбуот хизмати.