Superliga 10-turidan o‘rin olgan “Navbahor” – “Mash’al” (2:1) uchrashuvidan keyingi matbuot anjumanining ikkinchi qismida mehmonlar ustozi Aleksandr Xomyakov qatnashib, jurnalistlarning savollariga javob berdi. Quyida uning fikrlarini e’tiboringizga havola etamiz.

"Namanganliklarni g‘alaba bilan tabriklayman. O‘yinning borishidan mamnun bo‘ldim. Boshqacha futbol namoyish etishni istagandik, ammo o‘yin boshida rejalarimiz amalga oshmadi. Tezkor hujumlarga o‘tishni uddalay olmadik. Birinchi bo‘lim oxirida kutilmaganda o‘z darvozamizdan to‘p o‘tkazib yubordik. Ikkinchi gol esa qarshi hujumda urildi. Qo‘pol xatoga yo‘l qo‘ydik. “Navbahor” ikkinchi bo‘limda o‘yin nazoratini bizga topshirib, asosan himoyalandi. Rejamiz ish bermadi.

Mag‘lubiyatga uchradikmi, demak, o‘yin shunga loyiq bo‘ldi. Menimcha, bugun tashabbusni osonlikcha berib qo‘ydik. “Navbahor”ning o‘z darvozasidan kam to‘p o‘tkazib yuborgani, himoyada yaxshi o‘ynashini bildiradi. Himoyadan o‘ynab, bo‘sh hududlarga ochilib, hujum uyushtirishga intiladi. Bizda ham himoyadan hujumga va aksincha, hujumdan himoyaga o‘tishda aniq o‘ynashimiz talab etiladi. “Navbahor” aynan hujumdan himoyaga o‘tishda tezkor harakatlandi. Umuman olganda, penaltini inobatga olganda, bizda ham aytarli vaziyat yaratilmadi. Mezbonlar tarkibida tajribali, futbol o‘ynashni biladigan futbolchilar jamlanishgan. Bugun biz juda ko‘p yakkakurashlarni boy berdik", — dedi Xomyakov.

“Navbahor” PFK matbuot xizmati.