Европа чемпионатининг ярим финал босқичидан ўрин олган Англия ва Дания терма жамоалари ўртасидаги учрашувда қизиқ ҳолат юзага келди.

Баҳснинг асосий вақти 1:1 ҳисобида якунлангач, ҳакам жамоаларни қўшимча бўлимларга таклиф этди. Қўшимча бўлимнинг дастлабкиси тугаш арафасида эса нидерландиялик рефери Данни Маккели Дания дарвозаси томон пенальти белгилади.

Англия термаси ҳужумчиси Стерлинг ўнг қанот бўйлаб рақиб жарима майдонига кириб борди ва пенальти ишлади. Раҳим ҳужумга ўтаётганида майдоннинг ўша қисмида ортиқча тўп ётганди. Қизиқ томони, англиялик футболчи ҳужумчи ўша пайтда ортиқча тўпнинг ёнидан югуриб ўтиб кетди. Ҳакамлар эса ўйинни тўхтатишмади ва вазият пенальти билан тугади. Хўш, ҳакамлар бу вазиятда хатога йўл қўйишдими?

Ўйин қоидаларига мурожаат қиламиз. Қоиданинг "Ўйинчилар" деб номланган бобида майдонда ортиқча шахслар, бегона буюмлар (жумладан, ортиқча тўп) ва ҳайвонлар (бир сўз билан уларнинг барчаси "бегона фактор" дея номланган) пайдо бўлса, ҳакам қандай қарор чиқариши кераклиги ҳақида ёзиб қўйилган.

Унга кўра, бегона фактор ўйинга аралашсагина ҳакам ўйинни тўхтатиши керак. Бегона жисм ўйинга таъсир кўрсатмаса, ўйин тўхтаган пайтда у майдонда олиб ташланиши зарур.

Қоиданинг давомида:

"Агар тўп дарвоза томон ҳаракатланаётган бўлса ҳамда бегона фактор ҳимояланаётган жамоанинг тўпни ўйнашига халал бермаса ва тўп дарвозага кирса (ҳатто тўп билан контакт бўлса ҳам) гол инобатга олинади", дея ёзиб қўйилган.  

Биз кўриб чиқаётган вазият пенальти билан якунланди. Ушбу ҳужум гол билан якунланганда ҳам, у инобатга олинар эди.

Демак, нидерландиялик ҳакам, майдонда ортиқча тўп борлигига қарамай, ўйинни тўхтатмасдан тўғри қарор қабул қилган.