Халқаро футбол тарихи ва статистикаси федерацияси XXI асрнинг энг яхши миллий чемпионатлари рейтингини эълон қилди. Ушбу рейтинг 2001-2011 йиллар оралиғидаги натижалар асосдан шакллантирилган бўлиб, уни ҳисоблаш принципи қуйидагича:
Ҳар бир мамлакатнинг энг кўп балл тўплаган 5та жамоаси танлаб олинади ва улар тўплаган очколар натижасида ҳар йилнинг энг яхши миллий чемпионати рейтинг жадвали эълон қилинади. 21-асрнинг энг яхши чемпионати рейтинги эса 11 йиллик натижаларнинг йиғиндисидир.

Демак, 2012 йилнинг бошига келиб, яъни 2011 йилнинг охиригача бўлган ҳисоб-китобларга кўра, Англия чемпионати 21-асрнинг энг яхши миллий биринчилигига айланиб олди. Бир йил олдинги натижаларга кўра, бу ўрин Испания чемпионатига тегишли эди. Бир йил ичида Премьер-лига Ла-лигадан ўтиб кетишга муваффақ бўлди. Италия А-серияси эса 3-ўринни эгаллаб турибди. Бразилия — 4, Германия — 5, Франция — 6, Аргентина — 7-поғоналарда қайд этилган.

Ўтган йилги натижаларга қараганда энг катта кўтарилишга эришган чемпионатлар Туркия (11 поғона) ва Бельгия (13 поғона) миллий чемпионатлари бўлди.  Шунингдек, Ўзбекистон ва Жанубий Корея футбол чемпионатлари ҳам 3 поғонадан юқори кўтарилган. Ўзбекистон Олий лигаси янги рейтингда 60-ўринни эгалламоқда. Бу Осиёда Япония (33), Ж.Корея (36), Саудия Арабистони (46), Эрон (50), Хитой (57)дан кейин 6-кўрсаткичдир. МДҲ миқёсида олиб қарайдиган бўлсак, Профессионал футбол  лигамизни Россия (17), Украина (18), Эстония (53) ва Грузия (58) миллий биринчиликлари ортда қолдиришган.

Рейтингнинг тўлиқ кўриниши билан IFFHS сайтида танишиб олишингиз мумкин.