Гана миллий терма жамоасининг бош мураббийи Горан Стефанович Африка Миллатлар Кубоги турнирида баъзи футболчилар шерикларига зарар бериш мақсадида сеҳру жоду ишлатишганлигини маълум қилди.
Унинг айтишича, турнир айни қизиган бир вақтда кутилмаганда термада бўлиниш юзага келган. Мураббий Гана футбол федерациясига юборган ҳисоботида терманинг турнирда нимага мувафаққиятсизликка учраганини жамоа ичида парокандалик юз бегани билан изоҳлаган.
“Бир-бирига зарар бериш мақсадида жоду ишлатишди, уларнинг бу тушунчадан воз кечишга ундаш барчамизнинг бурчимиз, улар ёрдамга муҳтож. Футболчилар бундай иш билан шуғулланмай, бир-бирларини ҳурмат қилишлари лозим” дейди мураббий ўз ҳисоботида.
Гана миллий терма жамоасининг собиқ футболчиларидан Сарфо Гьяни бу ҳисоботдан ҳайратга тушмаганини, балки 1992 йилги турнирда ҳам баъзи футболчилар жоду билан машғул бўлишганини қўшимча қилди. “У пайтлари футболчилар ўзларини асраш, омадлари келишини таъминлаш мақсадида бу иш билан шуғулланишар эди. Лекин асло бир-бирини мувафаққиятсизлиги учунмас” деди у.
