Томас Вермаленнинг жароҳат олганига қарамай 90 дақиқа ўйнатган Бельгия терма жамоаси мураббийларига заҳрини сочган Арсен Венгер халқаро ўртоқлик учрашувларни умуман керак эмаслиги ҳақида фикр юритди.
"Арсенал" вакили Вермаленнинг жароҳати борлигини била туриб, Греция билан ўтказилажак ўртоқлик учрашувга чақирилган эди. Бу ҳол Арсен Венгернинг тепа сочини тикка қилди: "Бельгияликлар мени ҳайратга солишди. Вермаленнинг "Ливерпул"га қарши ўйинда майдонга тушиш-тушмаслиги сўроқ остида. Жароҳати бор футболчини узоқ сафарда оввора қилганлари етмаганидек, ўртоқлик учрашувида 90 дақиқа майдонда ўйнатишди. Ваҳоланки, Бельгия Евро-2012да қатнашмайди".

Француз мураббийнинг фикрига кўра, терма жамоалар ўртасида ўтказиладиган ўртоқлик учрашувлари умуман керак эмас экан. "Расмий ўйинларда клубимдаги ҳеч бир ўйинчининг кетишига қаршилик қилмадим. Бироқ, ўртоқлик учрашувлари йилдан-йилга кўпаймоқда. Айниқса, мавсум сўнггида футболчиларимизнинг бу каби кераксиз ўйинларида жароҳат олиши бизга қимматга тушади" дейди у.