Ўзбекистонлик таниқли мутахассис Алишер Никимбаев "Насаф"нинг Осиё чемпионлар лигаси саралаш босқичида Бирлашган Араб Амирликларининг "Банияс" клубига қарши ўйиндаги имкониятлари борасида ўз фикрини билдириб ўтди.

"Ҳозирги кунда "Банияс" БАА чемпионатининг ўртамиёна жамоаси. Ушбу клуб тахминан ҳар ўн йилда мавсумни жуда яхши ўтказади ва Осиё чемпионлар лигаси финалига чиқади. Шундан сўнг яна орқага кетади. Айни пайтда "Банияс" биринчи даврадан (13-турдан) сўнг 23 очко билан 6-ўринда бормоқда. Жамоа 5-ўриндаги клубдан 5 очко ортда қолаётган бўлса, 11-ўриндан бор-йўғи 3 очко олдинда бормоқда. Яъни, навбатдаги очко йўқотишлар "Банияс"ни янада қуйи ўринларга тушириб юборади.

Аммо бу нарса "Насаф"ни чалғитмаслиги керак. Одатда Амирлик клублари ўз эътиборларини икки ёки уч мусобақага қаратишга ўрганишмаган. Агар ички чемпионатда уларнинг ишлари яхши кетмаётган бўлса, улар эътиборларини кўпроқ БАА президенти кубоги ёки Осиё чемпионлар лигасига қаратишади. Масалан, "Ал-Жазира" шундай қилганди. Бу клуб икки марта маҳаллий чемпионат учун ОЧЛни қурбон қилганди.

БАА президенти кубогида "Банияс" ярим финалга чиқди ва бу билан тўхтаб қолишни истамайди. Чунки, ушбу мусобақадаги ғолиблик клубга ОЧЛда иштирок этиш имкониятини беради. Шу боис, катта эҳтимол билан, "Банияс" чемпионатни қурбон қилади.

Аммо, бошқа савол туғилади: "Банияс" Чемпионлар лигасини қурбон қиладими? Ёки бор эътиборини ушбу турнирга қаратадими? Назаримда, "Банияс" ОЧЛга эътибор қаратади. Шунинг учун "Насаф"га осон бўлмайди. Шундан келиб чиқиб "Банияс" - "Насаф" баҳсида жамоаларнинг имкониятларини 50/50 баҳолайман. Бунда мезбонлар учун уй стадиони фактори муҳим аҳамиятга эга бўлади. Аммо Абу-Даби шаҳрида жойлашган бу жамоанинг мухлислари унчалик кўп эмас", — дея ёзди Никимбаев ўзининг телеграмдаги канали орқали.