O‘zbekistonlik taniqli mutaxassis Alisher Nikimbayev "Nasaf"ning Osiyo chempionlar ligasi saralash bosqichida Birlashgan Arab Amirliklarining "Baniyas" klubiga qarshi o‘yindagi imkoniyatlari borasida o‘z fikrini bildirib o‘tdi.

"Hozirgi kunda "Baniyas" BAA chempionatining o‘rtamiyona jamoasi. Ushbu klub taxminan har o‘n yilda mavsumni juda yaxshi o‘tkazadi va Osiyo chempionlar ligasi finaliga chiqadi. Shundan so‘ng yana orqaga ketadi. Ayni paytda "Baniyas" birinchi davradan (13-turdan) so‘ng 23 ochko bilan 6-o‘rinda bormoqda. Jamoa 5-o‘rindagi klubdan 5 ochko ortda qolayotgan bo‘lsa, 11-o‘rindan bor-yo‘g‘i 3 ochko oldinda bormoqda. Ya’ni, navbatdagi ochko yo‘qotishlar "Baniyas"ni yanada quyi o‘rinlarga tushirib yuboradi.

Ammo bu narsa "Nasaf"ni chalg‘itmasligi kerak. Odatda Amirlik klublari o‘z e’tiborlarini ikki yoki uch musobaqaga qaratishga o‘rganishmagan. Agar ichki chempionatda ularning ishlari yaxshi ketmayotgan bo‘lsa, ular e’tiborlarini ko‘proq BAA prezidenti kubogi yoki Osiyo chempionlar ligasiga qaratishadi. Masalan, "Al-Jazira" shunday qilgandi. Bu klub ikki marta mahalliy chempionat uchun OCHLni qurbon qilgandi.

BAA prezidenti kubogida "Baniyas" yarim finalga chiqdi va bu bilan to‘xtab qolishni istamaydi. Chunki, ushbu musobaqadagi g‘oliblik klubga OCHLda ishtirok etish imkoniyatini beradi. Shu bois, katta ehtimol bilan, "Baniyas" chempionatni qurbon qiladi.

Ammo, boshqa savol tug‘iladi: "Baniyas" Chempionlar ligasini qurbon qiladimi? Yoki bor e’tiborini ushbu turnirga qaratadimi? Nazarimda, "Baniyas" OCHLga e’tibor qaratadi. Shuning uchun "Nasaf"ga oson bo‘lmaydi. Shundan kelib chiqib "Baniyas" - "Nasaf" bahsida jamoalarning imkoniyatlarini 50/50 baholayman. Bunda mezbonlar uchun uy stadioni faktori muhim ahamiyatga ega bo‘ladi. Ammo Abu-Dabi shahrida joylashgan bu jamoaning muxlislari unchalik ko‘p emas", — deya yozdi Nikimbayev o‘zining telegramdagi kanali orqali.