Ўзбекистон 21-миллий чемпионатини муваффақиятли бошлаган Ғузорнинг ««Шўртан» клуби бугун Ўзбекистон Кубоги доирасида Хиванинг «Хива» клуби меҳмони бўлди.

 Игорь Криушенко бошчилигидаги «Шўртан» футболчилари кубок баҳсларини ҳам муваффақиятли бошлашди. Наманганнинг «Навбаҳор» жамоасини йирик ҳисобда мағлуб этилганидан сўнг, Игорь Николаевич бир қатор асосий футболчиларга дам беришга қарор қилди. Шу боис учун ҳам «оқ бўрилар» бош мураббийи Асрор Алиқулов, Отабек Валижонов, Александр Корнейчук, Ҳамза Каримов ва Игорь Таран каби футболчилар Хива шаҳрига олиб кетмади.

Таркиб ва тажриба бобида ҳам биринчи лига вакилларидан устун бўлган “Шўртан” клуби учрашувни тўлалигича ўз назоратида ушлаб турди ва катта ташаббусга эга бўлди. Майдоннинг аҳволи жуда ҳам ёмон бўлганлиги сабабли, “Шўртан” стадионга йиғилган мухлислар кутган ўйинни намойиш этиб бера олмади. Биринчи таймнинг ўзида “Оқ бўрилар” бир қатор хавфли вазиятлар содир этишди ва ана шуларнинг иккитасини голга айлантиришга муваффақ бўлди.

Вадим Афонин томонидан ошириб берилган тўпни рақиб дарвозасига йўллаган Таина Соро учрашувдаги дастлабки гол муаллифига айланган бўлса, иқтидорли футболчи сифатида клубга таклиф этилган Виталий Рушницкий иккинчи голни ўз номига ёздириб қўйди ва “Шўртан” жамоаси таркибида расмий ўйинлардаги голлар сонини очишга муваффақ бўлди.

Шу тариқа, Ўзбекистон Кубоги 1/16 финал босқичидаги Хоразмнинг “Хива” жамоаси майдонига ташриф буюрган “оқ бўрилар” 0:2 ҳисобида ғалаба қозонишди ва кубокнинг кейинги босқичига йўл олишди.

Энди Игорь Криушенко шогирдлари 1/8 финал босқичида Тошкентнинг “Бунёдкор” жамоаси беллашади.

ХИВА – ШЎРТАН 0:2
Голлар: Таина Соро, Виталий Рушницкий.

ШЎРТАН: М. Наумов, Я. Крушелницкий,  П. Агбо, Л. Убайдуллаев, О. Жўрабоев (Р. Бердимуродов), Б. Қодирқулов, В. Пономарёв (А. Амонов), В. Афонин, Т. Соро, В. Рушницкий, М. Мамазулумов (В. Клишин).