Осиё футбол конфедерацияси Қаршининг “Насаф” клубини жаримага тортди.

Бунга жамоанинг ОФК кубоги 2021 йилги мавсум доирасидаги Гонконгниннг “Ли Ман” клуби билан учрашувда хавфсизлик ва карантин қоидаларига риоя этмагани асос бўлган.

Тартиб-интизом қўмитасининг қарорларида келтирилишича “Насаф” ва “Ли Ман” жамоалари ўртасидаги учрашувда бир қатор қоидабузарликлар қайд этилган:

Унга кўра:

-320 нафар мухлис футболчилар захираси учун мўлжалланган жойга ўтирган;

-2 нафар мухлис ҳакамнинг якуний ҳуштаги чалинганидан кейин майдонга тушиб кетган;

-клуб хавфсизлик бўйича ўз зиммасидаги вазифаларни таъминлай олмаган;

майдон атрофида аккредитацияси йўқ шахслар юрган;

-томошабинлар стадионда тамаки чеккан.

ОФКнинг Тартиб-интизом қўмитаси юқоридаги ҳолатларни ўрганиб чиқиб, қарор чиқарган:

Қарорга мувофиқ:

1) “Насаф” тартиб-интизом кодексининг 22.2 бандини бузгани учун 28 минг АҚШ доллари миқдорида жарима тўлайди;

2) Тартиб-интизом кодексининг 34.1 ва 34.3 бандларини бузгани учун шартли равишда (!) 21 минг АҚШ доллари миқдорида жарима. Бу банд агар яқин 2 йил ичида шу ҳолат яна такрорлансагина фаоллашади;

3) Тартиб-интизом кодексининг 1-параграфи бўйича 90 кун ичида 7 минг АҚШ доллари тўлаш мажбурияти.

Шунингдек, шундай ҳолат яна қайтарилса, бундан ҳам қаттиқроқ чора кўрилиши таъкидланган.