Дортмунднинг «Боруссия» клуби ярим ҳимоячиси Юлиан Брандт RN нашрига берган интервьюсида суҳбатдошининг турли мавзудаги саволларига жавоб қайтарди.
- Франкфуртдаги ғалабадан сўнг (2022 йил 8 январь. «Айнтрахт» - «Боруссия Дортмунд» - 2:3), Эрлинг Холанддан «Твиттер»да сочини калталатишини сўрашди. У эса оддийгина «йўқ» деб жавоб берди. Сизнинг сочингиз ҳам сезиларли даражада ўсибди. Мухлислар нима дейишяпти?
- Бу борада фикрлар турлича (кулади). Кўриниб турибдики, калта соч турмаклари ҳозир анча урф бўлган. Аммо Эрлингнинг жавоби ҳам ёмон эмас.
- Айрим спортчилар ўзгариш истагини кўрсатиш учун ташқи кўринишига ўзгартиришлар киритишади. Сизни бунга нима ундади?
- Сочимни ўстиришимга алоҳида сабаб йўқ, бунда ҳеч қандай ёмонлик ёки хавфни кўрмадим. Эрлинг 2020 йил март ойидан, коронавирус пандемияси бошланган пайтдан бери сочини ўстиради. Биринчи карантин пайтида биз кунига икки маҳал машғулот ўтказардик. Ўшанда Холанд ўсаверсин, деб айтганди. Унинг учун бу узоқ муддатли лойиҳа. Менда ҳам 8-9 ойдан бери давом этмоқда. Лекин бу ҳақда ўйлайдиган даражада бекорчи эмасман: майдонда аҳмоққа ўхшайман ва энди яна калта соч билан югуришим керак.
- Ўтган мавсум ишларингиз унчалик юришмади. Қаерда хато қилдингиз?
- Бу ерда гап кўплаб майда деталлардадир. Мен учун жуда қийин бўлди, чунки мавсум томошабинларсиз ўтган ўйинлар билан якунланди. 50, 60 ёки 80 минг мухлис кўз олдида ўйнашни афзал кўришимни яширмайман. Шундай бўлсада, шахсан мени қизиқтирган бошқа нарсалар ҳам бор эди, албатта. Бу мутлақо менинг йилим эмасди. Оддий тартибсиз ҳаётга киришолмадим ва ўзим билан курашдим. Ҳар ҳолда, «жарлик»ка тушиб қолгандан сўнг, ундан чиқиш унчалик осон эмас. Боз устига, мураббий Люсьен Фавр Эдин Терзичга алмаштирилди. Натижада, менга тўғри келмайдиган бир нечта ўзгаришлар кузатилди. Ҳаммасини қандай бўлса, шундай қабул қиламан, деб ўзимга қасам ичдим. Бу мен учун яхши тажриба бўлди, шу туфайли кўп нарсаларни ўргандим. Кўпчилик сизни қийнашни ёки клубда келажагингиз борлигини сўрашни бошласа, осон эмас экан. Бу мени бутунлай шакллантирди. Энди эса ҳаммасини ортда қолдириб, фақат олдинга қарайман.
- Марко Розенинг айтишича, жамоа муваффақиятсизликлардан кейин, жумладан, бутун 90 дақиқа давомида яхши курашишни ўрганиши керак. Ўйиндаги хатолардан қанчалик ғазабланасиз? Уларни қанчалик тез унутасиз?
- Бизнинг ҳозирги ўйин фалсафамиз бунга ёрдам беради. Мураббий хатоларни зудлик билан унутиб, дарҳол рақибга яна босим ўтказишимизни талаб қилмоқда. Демакки, нима бўлиши ҳақида узоқ ўйламаслигингиз керак. Шахсан мен таваккал қилишни афзал биламан. Орқага тўп узатишни ёқтирмайман ва бу ҳеч қачон менинг табиатимда бўлмаган. Натижада, эҳтимол, хатолар кўпроқ бўлар, лекин энг муҳими - реакция. Ўзим билан умуман зиддиятга киришмайман, лекин «Герта» билан ўйиндаги каби хатоларим ўтказиб юборилган голларга олиб келса ёки салбий оқибатларга сабаб бўлса, албатта, хавотирга тушаман. Ўшанда ўйиндан сўнг жуда ранжидим. Қандай бўлмасин, олд чизиқдаги ҳаракатларим билан фарқ яратишга ҳаракат қиламан. Ахир бу менинг ишим. Албатта, хатолар сонини имкон қадар камайтириш мақсадим ҳам бор.
- Коронавирус ҳаётингизни қанчалик ўзгартирди?
- Одамлар кўпроқ ўзларига эътибор беришади. Бу ҳақиқий тажриба. Ҳозир кўп вақтимни уйда ўтказяпман. Оилам даврасида ўтказган онлар мен учун янада қадрлироқ бўлди. Ота-онам икки йилдан бери стадионга келишмаган ва биз бир-биримизни камроқ кўра бошладик. Икки ярим йилдан бери шу ердаман. Бу вақт ичида 8-9 ой давомида «Боруссия» стадиони муҳитини тўлиқ ҳис қила олдим ва бу, албатта, ростини айтсам, анча ачинарли. Жуд Беллингем каби бир қатор футболчиларимиз ҳеч қачон мухлисларга тўла стадионда ўйнашмаган. Сиз буни шундай қабул қиласиз. Шахсан мен бу мавзуга унчалик аҳамият бермайман. Фақат туннель охирида ёруғлик пайдо бўлишига умид қиламан. Ёзда мухлислар стадионга боришди, қишда эса яна ёпилди. Умид қиламанки, келажакда яхшироқ ечимлар топилади.
- «Аякс» билан ўйин олдидан жамоага кириб келган «кичик кирлар» ҳақида гапиргандингиз. Мавсумнинг иккинчи ярмида муваффақият қозониш учун «Боруссия»нинг ўйини қанчалик «ифлос» ва қанчалик «тоза» бўлиши керак?
- Тўп билан иложи борича сокин, тўпсиз эса, мос равишда, тажовузкорроқ бўлиш керак. Албатта, бу ўринда гап рақибни синдириш ёки сариқ карточка олиш ҳақида кетмаяпти. Рақиб бизни ўзидан анча «қўпол»роқ эканимизни ҳис қилиши керак. Лекин рақибга бу тарзда таъсир ўтказиш учун қўлидан келганини қиладиган эмас, аксинча, кўплаб яхши футбол ўйнашни хоҳлайдиган футболчиларга эга жамоамиз. Бу мени, Рафаэль Геррейрони ёки Торган Азарни Артуро Видалга айлантирмайди. Ушбу йўналишни қисман бўлса-да яхшилашимиз биз учун жуда муҳим. Ва, менимча, тажовузкорликни оширишимиз мумкин. Чунки бу бизнинг тўпсиз ўйинимизга мос келади. Шундагина ўзимизни кўрсатиш ва кўп гол уриш имконияти ортади, Жуд ва Эрлинг «Айнтрахт»га қарши ўйинда почин қилишгани каби (кулади).
- Мавсумнинг иккинчи ярмида кўплаб футболчилар, жумладан, сиз учун ҳам кўп нарса хавф остида қолади. Калит сўз - бу жамоа. Сиз эса унга ноябрь ойидагина қайтдингиз, ЖЧ-2022 саралаш босқичини ва 14та ўйин-ни деярли ўтказиб юбордингиз. Ташқи кузатувчи бўлиш қандай экан? Қатарда бўлиб ўтадиган ЖЧда қандай истиқболларни кўрасиз?
- Албатта, бу мен учун ноодатий тажриба бўлди. Аммо шу вақт ичида кўп нарсаларни ўргандим. Энди қайтдим ва Ханси Флик билан яхши алоқадаман. У дарҳол мен билан боғланди ва айрим жиҳатларда ўз нуқтаи назарини тушунтирди. У мендан нима кутаётганини аниқ айтди. Ҳаммада жамоага кириш имконияти бор. Ханси барча футболчиларни диққат билан кузатиб боради. Албатта, жаҳон чемпионати - катта воқелик. Мундиалда аввал ҳам бўлганман, барибир, бу мен учун болалик орзум эди. Биз йил бошида турибмиз, жаҳон чемпионатигача эса ҳали анча бор.
- Ўша вақтгача сочингиз қандай кўринишда бўлади?
- (кулади) Тўхташ вақти келди. Улар энди ўсмайди. Мен Эрлинг каби бўлмайман. Уларни яна кесиб ташлайдиган вақт келади, чунки ортиқча соч мени безовта қилади. Аммо ҳали қишдамиз, сочлар эса бошни иссиқ тутишга ёрдам беради.
