"2022 йилги мавсумда Ўзбекистон Профессионал футбол лигаси томонидан ўтказиладиган мусобақалар регламенти"нинг 20.1-бандида Биринчи лига жамоалари ҳамда Иккинчи лигаларнинг ўз ҳудудида ғолибликни қўлга киритган жамоалари (фақат ЎФА қўйган талабларни бажарганлар) Ўзбекистон кубогига саралаш учрашувлари орқали қўшилиши белгиланган.

Айни вақтда ЎзПФЛ Биринчи лига учун рўйхатдан ўтказган 16 та клуб орасида ўз ҳудудининг Иккинчи лигасида ғолибликни қўлга киритган айрим жамоалар ҳам мавжуд: "Шаҳриҳончи" (Андижон), "Дўстлик" (Фарғона), "Дўстлик" (Тошкент), "Юниред" (Самарқанд), "Қумқўрғон-1977" (Сурхондарё). Қолган ҳудудлар эса 2021 йилги мавсумда ғолибликни қўлга киритган жамоаларинг Ўзбекистон кубоги мусобақасининг саралаш учрашувларида иштирок этиш учун шароити бор ёки йўқлигига аниқлик киритиб бериши сўралади.

Аризалар ҳудудий ассоциациялар вице-президентларнинг кафолат хати асосида шу йилнинг 6 март санасига қадар қабул қилинади. Мусобақа учун футболчиларни рўйхатдан ўтказиш жараёни эса 7—20 март кунлари оралиғида амалга оширилади.

Маълумот учун, Ўзбекистон кубогининг саралаш учрашувлари шу йилнинг 22—31 март кунлари Тошкент шаҳрида марказлашган ҳолда ташкил этилади.