"2022 yilgi mavsumda O‘zbekiston Professional futbol ligasi tomonidan o‘tkaziladigan musobaqalar reglamenti"ning 20.1-bandida Birinchi liga jamoalari hamda Ikkinchi ligalarning o‘z hududida g‘oliblikni qo‘lga kiritgan jamoalari (faqat O‘FA qo‘ygan talablarni bajarganlar) O‘zbekiston kubogiga saralash uchrashuvlari orqali qo‘shilishi belgilangan.

Ayni vaqtda O‘zPFL Birinchi liga uchun ro‘yxatdan o‘tkazgan 16 ta klub orasida o‘z hududining Ikkinchi ligasida g‘oliblikni qo‘lga kiritgan ayrim jamoalar ham mavjud: "Shahrihonchi" (Andijon), "Do‘stlik" (Farg‘ona), "Do‘stlik" (Toshkent), "Yunired" (Samarqand), "Qumqo‘rg‘on-1977" (Surxondaryo). Qolgan hududlar esa 2021 yilgi mavsumda g‘oliblikni qo‘lga kiritgan jamoalaring O‘zbekiston kubogi musobaqasining saralash uchrashuvlarida ishtirok etish uchun sharoiti bor yoki yo‘qligiga aniqlik kiritib berishi so‘raladi.

Arizalar hududiy assosiasiyalar vise-prezidentlarning kafolat xati asosida shu yilning 6 mart sanasiga qadar qabul qilinadi. Musobaqa uchun futbolchilarni ro‘yxatdan o‘tkazish jarayoni esa 7—20 mart kunlari oralig‘ida amalga oshiriladi.

Ma’lumot uchun, O‘zbekiston kubogining saralash uchrashuvlari shu yilning 22—31 mart kunlari Toshkent shahrida markazlashgan holda tashkil etiladi.